په بلوچستان کې د ټي ټي پي څلور غړي وژل شوي او دوه پولیس ټپیان دي

د خان وکیل نعیم پنجوته وايي، د رسمي او پټو اسنادو ځانګړې محکمې دا پرېکړه په اټک جېل کې ښاغلي خان ته اورولې ده.

عمران خان د اګسټ پر پنځمه د توشه خانې دوسیې له امله په اټک جېل کې د دریو کلونو بند پیل کړ.

خو د اسلام اباد سترې محکې پرون د ضمانت په بدل کې د نوموړي دا سزا وځنډوله، اما ویې ویل چې د رسمي رازونو د دوسیې له امله به په بند کې وي او بهر هم نشي تللی.

اوس د پټو او رسمي اسنادو محکمه وايي، چې عمران خان به د سپټمبر تر ۱۳ بندي وي، تر څو دوی په دې هکله خپلې پلټنې بشپړې کړي.

نوموړی تورن دی چې به امریکا کې د پاکستاني سفیر لیک یې د خپلې ګټې لپاره له خلکو سره شریک کړی دی.

عمران خان هغه لیک ته په اشاره ادعا کړې وه، چې امریکا د نوموړي په ګوښه کولو لاس درلود.

د لکي مروت د پولیسو ویاند شاهد حیات وايي، چې نن دوشنبه(د وږي ۶مه) د لکي مروت د پېزو کلي ته څېرمه پولیس پر ګزمه بوخت وو، چې د وسلوالو له یوه کمين سره مخ شوي دي.

نوموړی زیاتوي، چې وسلوالو پر پولیسو ډزې کړي او په موټر کې سپاره دوه پولیس یې وژلي او درې نور یې ټپیان کړي دي.

حیات زیاتوي، چې ټپي پولیس یې روغتون ته د درملنې لپاره لېږلي او وسلوال د پېښې له سیمې څخه تښتېدلي دي.

تر اوسه د دغه برید مسوولیت چا پر غاړه نه دی اخیستی، خو په دې وروستیو کې د لکي مروت د اکثرو بریدونو پړه تحریک طالبان پاکستان پر غاړه اخیستې ده.

د یادونې وړ ده، چې په دې وروستیو کې په پښتونخوا کې پر پولیسو او امنیتي ځواکونو د وسلوالو په بریدونو کې د پام وړ زیاتوالی راغلی او پاکستاني چارواکي په دا ډول بریدونو کې د افغانانو لاس لرل یاد کړي دي.

د پي ټي ایم لسګونو غړو نن یکشنبه (د وږي ۵مه) د اروپايي پارلمان مخې ته په لاریون کې د پاکستان د پوځ له خوا د پي ټي ایم د غړو نیول کېدل وغندل او ویې ویل، چې دغه پوځ د پښتنو پر وړاندې متشدد برخورد کوي او ګڼ پښتانه یې نیولي دي.

لاریونوالو ویل، چې د پاکستان پوځ د پي ټي ایم لسګونه غړي په غیر قانوني ډول نیولي، شکنجه کړي او ان ځینې یې لادرکه دي.

دوی پر اروپايي پارلمان هم غږ وکړ، چې په پاکستان کې د بشري حقونو ضد کړنو ته غبرګون وښيي او پر پاکستان فشار راوړي چې له پښتنو سره متشدد برخورد ودروي.

لاریونوالو په نورو اروپايي هېوادونو کې د لاریونونو خبر ورکړ او زیاته یې کړه، چې تر هغې به لاریونونو ته دوام ورکړي تر څو یې د تحریک غړي له بنده نه وي ازاد شوي.

د یادونې وړ ده، چې تېره اونۍ د پي ټي ایم مشر منظور پښتین هم د خپلو غړو د نیولو خبر ورکړی و او د یوه لېست په خپرولو سره یې ویلي وو، چې د پاکستان په پنځلسو سیمو کې یې ملګري نیول شوي دي.

دا لومړی ځل نه دی، چې په پاکستان کې د پي ټي ایم غړي نیول کیږي، له دې وړاندې د دغې ډلې لسګونه غړي د سیاسي هلو ځلو په تور زندانیان شوي دي.

د پاکستاني رسنیو د راپور له مخې، د سیند حکومت دا هم وايي، چې د واکسین بریښنايي ریکارډ هم جوړېږي او تر دې وروسته به هغو کسانو ته زېږلیک یا د زېږېدو سند نه ور کول کېږي چې واکسین یې ثبت شوی نه وي.

د سیند والي کامران ټیسوري پرون - د اګسټ ۲۵- دا لایحه تصویب کړې ده چې موخه یې د پولیو او نورو ناروغیو مخنیوی او د هغو په مقابل کې بدني پیاوړتیا ښودل شوې ده.

افغانستان او پاکستان په نړۍ کې دوه داسې هېوادونه دي چې پولیو پکې شته.

پاکستان کې د پولیو او نورو واکسینونو لپاره هڅې په داسې مهال دي چې په افغانستان کې د طالبانو واکمنېدو سره د دې واکسین هڅې ټکنۍ شوې دي.

د روغتیا نړیوال سازمان تازه خبرداری ور کړی چې په کندهار کې د پولیو ضد کور په کور کمپاین په محدودېدو سره په دغه ولایت کې ماشومان په پراخه کچه د پولیو له سخت خطر سره مخ دي.

دغه سازمان وايي، سږ کال په افغانستان کې د پولیو ۳۲ مثبتې پېښې ثبت شوې دي

د رسمي شمېرو له مخې، د ډالر په مقابل کې تر پرون راهیسې د روپۍ ارزښت ۷۸ پیسې غورځېدلی دی.

د جیو نیوز راپور وايي، په تېره یوه اونۍ کې په رسمي کچه د پیسې په مقابل کې د ډالر ارزښت ۵ روپۍ او ۲۲ پیسې پورته شوی دی.

د پاکستان مرکزي بانک د پنجشنبې په ورځ په اول ځل وویل، چې یو ډالر له درې سوه روپیو سره برابر شوی دی.

دا په تاریخ کې لومړی ځل و چې د ډالر په مقابل کې د روپۍ ارزښت په ریکارډ کچه ټیټ شو.

د روپۍ د ارزښت کمېدو سره په پاکستان کې د خوراکتوکو په ګډون د مختلفو اړتیا وړ شیانو بیې هم زیاتېږي.

د ډالر او نورو پیسو په مقابل کې د روپیو ارزښت له څو میاشتو راهیسې کمېږي او باور دا دی چې دا کرنسي به ارزښت نور هم وبایلي.

همدا وجه ده چې پاکستاني وګړي خپلې روپۍ ډالرو ته اړوي چې دا هم د روپۍ ارزښت کمېدو کې رول لري.