پاکستانۍ رسنۍ وايي په اګست میاشت کې، چې نن پای ته رسېږي، ډالر د پاکستانۍ کرنسۍ په مقابل کې ۱۸ روپۍ او ۹۰ پیسې ګران شوی دی. د پاکستان مرکزي بانک د پنجشنبې په ورځ وویل، چې نن یو ډالر له ۳۰۵ روپیو او ۵۴ پیسو سره برابر شوی دی.
خو په ازاد بازار کې یو ډالر له ۳۲۳ روپیو سره تبادله کېږي.
د جیو نیوز د راپور له مخې، د چارشنبې په ورځ یو ډالر له ۳۰۴ روپیو او ۴۵ پیسو سره برابر و او په دې ترتیب یې یوه روپۍ نور هم ارزښت بایللی دی.
خو په ازاد بازار کې روپۍ د پنجشنبې په ورځ د ډالر په مقابل کې خپل ارزښت درې روپۍ او ۵۰ پیسې بایللی دی.
نږدې اونۍ وړاندې د پاکستان بانکونو کې یو ډالر له درې سوه روپیو سره برابر شو.
د روپۍ د ارزښت کمېدو سره په پاکستان کې د خوراکتوکو په ګډون د مختلفو اړتیا وړ شیانو بیې هم زیاتېږي.
د ډالر او نورو پیسو په مقابل کې د روپیو ارزښت له څو میاشتو راهیسې کمېږي او باور دا دی چې دا کرنسي به ارزښت نور هم وبایلي
