د پاکستان جیو نیوز وايي، د دغه هېواد ولسمشر وړم او سږ کال دوه ځلې د خپل معاش د زیاتېدو غوښتنه کړې ده. عارف علوي اوس نږدې اته نیم لکه پاکستانۍ روپۍ تنخا لري، خو د ۲۰۲۱ کال جولای کې یې لس لکه ۲۴ زرو ته د دې پیسو پورته کېدل غوښتي و.
جیو نیوز زیاتوي چې نوموړي تېر جولای هم بیا غوښتنه کړې چې معاش دې ورته ۱۲ لکه ۲۹ زره روپۍ شي.
د روانې میاشتې په لومړیو کې نوموړي د خپل منشي له لارې د کابینې منشي ته لیک استولی او غوښتنه یې کړې ده چې د هرې نېټې له غوښتنې سره سم دې د ولسمشر تنخا او نور امتیازات زیات شي.
کابینې هم دا موضوع د قانون وزارت ته سپارلې او دې وزارت هم د اګسټ پر ۱۸ له کابینې غوښتي چې د ولسمشر پر تنخا زیاتولو کار پیل کړي.
وروسته دا موضوع مالي برخې ته سپارل شوې او هغوی هم د اګسټ پر ۲۲ د ولسمشر د معاش زیاتېدو ملاتړ کړی دی او دا مسله به اوس کابینې ته سپارل کېږي.
که کابینه دا موضوع منظوره کړي، نو ولسمشر ته به نه دا چې معاش زیات شي، بلکې د ۲۰۲۱ کال راهیسې پاتي یا باقي برخه به هم ور کړل شي.
