د کډوالو چارو وزارت پر اېکس شبکې لیکلي،چې د ملګرو ملتونو د کډوالو چارو ادارې په لغمان ولایت کې ۶۳ کورنیو، د ډنمارک د کډوالو ټولنې په غزني ولایت کې ۲۱۷ کورنيو او د بشري مرستو د همغږۍ موسسې په پروان ولایت کې ۳۱ کورنيو سره د نغدو پیسو مرستې وکړې.
د دغه وزارت په خبرپانه کې راغلي، چې دغه مرستې د بېځايه شویو او بېرته راستنېدونکو کورنيو د لومړنيو اړتياوو د پوره کولو په موخه شوې دي.
د یاد وزارت د خبرپاڼې له مخې، په غزني ولایت کې پر اړمنو کورنیو له ارزونې وروسته د هغو اړتیاوو ته په کتو مرستې وېشل شوې دي.
له دې سره، په لغمان او پروان ولایتونو کې هم اړمنو او بېوزله کورنیو سره نغدي مرسته شوې ده.
په همدې حال کې، له دغو ټولو مرستو سره، سره بیا هم د افغانستان لپاره د سره صليب نړۍوالې کمېټې په دې وروستيو کې اعلان وکړ، چې د افغانستان نيمايي وګړي خوراکي او روغتيايي خدمتونو ته لاسرسى نه لري.
ډېر شمیر نړۍوالې ادارې د روان کال تر پایه پورې د بودجې له کمښت سره مخامخ شوې، او وایي چې دوی په افغانستان کې د بشري ناورین له رامنځته کېدو هم اندېښمن دي.
