هند پر سپوږمۍ د خپلې ستوربېړۍ تر کېنولو وروسته د شنبې په ورځ د لمر څېړلو لپاره توغندی وتوغاوه. دا اول ځل دی چې هند خپل لمري یا شمسي ماموریت پیلوي او د دې ستوري مطالعې ته مخه کوي. هندي ساینسپوهانو د دې توغندي توغول بریالي بللي.
لمر ته د توغندي توغولو سیمې ته نږدې په زرګونو خلک غونډ شوي وو.
د هند تشیالي ادارې وېبپاڼې دا پرمختیا په ژوندۍ بڼه خپروله چې له اته لکه شپېتو زرو ډېرو کسانو لیدله.
هند دې توغندي سره د هغو لمري بادونو مطالعه کول غواړي چې په ځمکه کې ګډوډي رامنځته کوي او معمولا د قطبي شفقونو په توګه لیدل کیږي.
د ادیتیا- اېل یو توغندي نوم له ادیتیا اخیستل شوی چې په هندو مذهب کې د لمر خدای ته وايي.
دا توغندی پر سپوږمۍ د هند د ستوربېړۍ له ناستې نږدې لس ورځې وروسته لمر ته توغول کېږي.
هند د سپوږمۍ پر سوېلي قطب د خپلې ستوربېړۍ په کېنولو سره روسیې ته ماتې ور کړه او لومړنی هېواد شو چې تر دغه ځای ځان رسوي.
د هند لومړی وزیر نریندر مودي د هند تشایلياداره هڅوي چې د متحده ایالتونو او چین تر اغېز لاندې فضا کې لوی رول ولوبوي.
د هند د کورنیو چارو وزیر امیت شاه اېکس شبکه کې لیکلي، لمر ته د توغندي توغول د ښاغلي مودي د لرلید په لور لوی ګام دی.
ادیتیا- اېل یو په څلورو میاشتو کې د یو نیم میلیون واټن وهلو لپاره جوړ شوی دی. دغه ځای ته رسېدو سره به د لمر د پورتني اتومسپیر په ګډون د دې ستوري مختلفې برخې مطالعه کوي.
