د ډان ورځپاڼې د راپور له مخې؛ د پاکستان د بهرنیو چارو وزارت یو ځلې بیا له طالبانو غوښتي، چې د « هغو کسانو یا ډلو پر وړاندې ګام واخلي، چې د پاکستان لپاره ګواښ دي» هغوی باید د نړۍوالې ټولنې سره په خپلو کړیو ژمنو عمل وکړي.
د پاکستان د بهرنیو چارو وزارت ویاندې ممتاز زهرا بلوڅ په خپل اوونیز خبري کنفرانس کې د جمعې په ورځ ویلي:« د هغوی مسسولیت، نړۍوال، دوه اړخیزه او درې اړخیزه مسوولیت دی، لکه څنګه چې د چین، افغانستان او پاکستان په درې اړخیزه ناسته کې دوی ژمنه کړې وه.
هغې د بهرنیو چارو د سرپرست وزیر د هغه بیان چې ګواکې طالب چارواکو په افغانستان کې هغه کسان نیولي چې د پاکستان په بریدونو کې ښکېل و، د پوښتنې په ځواب کې وویل:« طالب چارواکو دغه ادعا رد کړې ده.»
اغلې بلوڅ زیاته کړه، دا د افغان چارواکو لپاره مهمه ده، چې "د هغو کسانو او ادارو پر ضد اقدام وکړي، چې پاکستان ته ګواښ پېښوي."
تر دې وړاندې هم څو ځلې د پاکستان د ناکراریو په اړه له افغان طالبانو غوښتل شوي و، چې د ترهګرو پر وړاندې دې اقدام وکړي او ادعا یې کړې وه، چې دوی ته د افغانستان له خاورې ګواښ پېښ دی؛ خو دا هغه ادعاوې دي، چې طالبانو په وار، وار رد کړې دي.
