په پاکستان کې د پرچون اتحادیو د شنبې په ورځ د برېښنا بېلونو د لوړې بیې او انفلاسیون له امله کاربندیز کړی. د پاکستان په دوو تر ټولو سترو ښارونو لاهور او کراچۍ کې ډېری مارکېټونه تړلي، خو څېرمه سیمو کې د خوراکتوکو او درملو پلورنځي پرانیستي وو.
د بلوچستان په مرکز کوټه کې هم د جماعت اسلامي په غوښتنه ټول ښار تړلی و.
د ټول پاکستان سوداګرو ټولنې مشر اشرف بټي رویټرز ته ویلي، نن سوداګرو په ټول پاکستان کې د بریښنا د نرخونو د زیاتېدو او ناعادلانه مالیاتو پر ضد کاربندیز کړی دی.
د پاکستان سوداګرو او د جماعت اسلامي مشرانو پرون پېښور کې خبري غونډې ته وویل، د شنبې په ورځ به په ټول پاکستان کې کاربندیز وي.
خو په پېښور، اسلام اباد او ملتان کې دا پرېکړه تر ډېره نه ده عملی شوې.
د پاکستان سرپرست لومړي وزیر ویلي چې د تېلو بیې ګرانېدو سره د برېښنا بېلونه هم ګران شوي دي.
په پاکستان کې د جمعې په ورځ د پټرولو او ډیزلو بیې بې سارې لوړې شوې. د یو لېتر د پټرولو بیه د ۱۴.۹ روپیو په زیاتېدو سره۳۰۵.۴ او د یو لېتر ډیزلو بیه د ۱۸.۴ روپیو په زیاتېدو سره۳۱۱.۸ روپیو ته پورته شوه.
د پاکستان د احصایې ملي اداره وايي، په دغه هېواد کې د کلني انفلاسیون یا د پړسوب کچه په اګسټ میاشت کې، چې پرون ختمه شوه، ۲۷.۴ سلنې ته پورته شوې ده.
دې ادارې د جمعې په ورځ یوه بیان کې وویل، انفلاسیون په اګسټ کې تر تېرې میاشتې ۱.۷ سلنه زیات شوی.
له تېرو څو میاشتو راهیسې د پاکستان روپۍ هم د ډالر په مقابل کې ارزښت بایللی او نن په ازاد بازار کې یو ډلر له ۳۳۰ روپیو پورته تبادله کېده.
