د پاکستان د ترهګرۍ ضد ادارې د پښتونخوا څانګې مرستیال مشر وايي، کره شواهد لري چې د دغه هېواد په بریدونو کې حقاني شبکه ښکېله ده. سهیل خالد وايي، له افغانستانه د بهرنیو پوځیانو په وتلو سره ډېر افغان طالبان هم له ټي ټي پي سره یو ځای شوي دي.
هغه له نیا دور سره مرکه کې وايي، په افغانستان کې د طالبانو واکمنېدو پسې د ټي ټي پي هغه پاکستاني وسلوال هم بېرته له دې ډلې سره یو موټی شول چې د افغان طالبانو په ملاتړ د بهرنیو ځواکونو پرضد جنګېدل.
د هغه په خبره، همدا وجه ده چې په پاکستان په تېره پښتونخوا کې ترهګریز بریدونه ډېر شوي دي.
د ترهګرۍ ضد ادارې دغه پاکستانی چارواکی وايي، دا مهال په پاکستان کې نږدې دوه نیم زره وسلوالو ته د بریدونو امر شوی او په دوی کې پر پاکستانیانو سربېره ډېر شمېر افغان هم دي.
سهیل خالد زیاتوي چې روان میلادي کال په تېرو اتو میاشتو کې په پاکستان کې ډېری ځانمرګي بریدونه افغانانو کړي او په اړه یې کره او تایید شوي مالومات لري.
پاکستان کې سږ کال تراوسه نږدې ۱۸ ځانمرګي بریدونه شوي چې تر تېر کال ډېر دي او دا ډېری بریدونه پښتونخوا کې شوي دي.
ښاغلی خالد وايي، د پاکستان تحریک طالبان پاکستان خپل جوړښت د افغان طالبانو په څېر کړی دی، پاکستان یې پر مختلفو ولایتونو وېشلی دی او اوس هزاره ډیویژن ته هم نفوذ کړی دی.
نوموړی وايي، د طالبانو په واکمنېدو سره د پاکستان تحریک طالبان ازادانه افغانسان کې ګرځي، خو د پخواني ولسمشر اشرف غني په وخت کې دومره ازاد تګ راتګ نشو کولی.
د نوموړي په خبره، اوس پر دې وسلوالو کوم بندیز نشته ځکه بې غمه له ډیورنډ کرښې اوړي او په پاکستان کې بریدونه کوي، ځکه پاکستان کې ترهګریزې پېښې هم زیاتې شوې دي.
طالبان بیا بیا په افغانستان کې د پاکستاني طالبانو شتون او د دغه هېواد په نارامۍ کې د افغانانو ښکېلتیا ردوي.
خو دې وروستیو کې د طالبانو مختلفو چارواکو له خپلو وسلوالو وغوښتل چې بهر ته د جګړې لپاره لاړ نه شي.
