د پاکستان د بې درکو کسانو د موندنې کمېسیون: تېره میاشت۷۴ کسان ورک شوي او د ۷ مړي موندل شوي
د ورکو شویو کسانو د موندنې دولتي کمېسیون په خپل تازه راپور کې وايي؛ په پاکستان کې تېره اګسټ میاشت ۷۴ کسان ورک شوي او د اوو نورو مړي موندل شوي دي.
د ورکو شویو کسانو د موندنې دولتي کمېسیون په خپل تازه راپور کې وايي؛ په پاکستان کې تېره اګسټ میاشت ۷۴ کسان ورک شوي او د اوو نورو مړي موندل شوي دي.
دغه کمېسیون په خپل راپور کې زیاتوي، چې تر اوسه ۶۷ لادرکه کسان خپلو کورونو ته ستانه شوي او ۷۸ پاتې بې درکه شويو کسانو پسې پلټنې روانې دي، چې د ځینو ځایونه په نښه شوي دي.
د ورکو شویو کسانو د موندنې دغه کمېسیون ویلي، چې تر اوسه ورسره ۹۹۶۷ د لا درکۍ پېښې ثبت شوي دي او دوی هڅه کوي چې ټولو پېښو ته رسیده ګي وکړي.
تېره میاشت د جیونیوز د راپور له مخې؛ په ټول پاکستان کې د روان کال په لومړیو شپږو میاشتو کې د جبري ورکو شویو شمېره ۵۹۱ ښودلې وه.
د ورکو شویو کسانو د موندنو کمېسیون زیاتوي، چې د روان کال په جنوري میاشت کې ۹۱، فیبروري کې ۹۹، اپریل کې ۹۱، می میاشت کې ۸۲ او جون میاشت کې ۲۹ د ورکو شویو کسانو قضیې ورسره ثبت شوي دي.
په پاکستان کې د جبري ورکو شویو قضیو لوړه برخه په بلوچستان او خېبر پښتونخوا کې ثبت شوي دي.
تېره میاشت هم په بلوچستان کې یو شمېر بلوچانو لاریون کړی و او د پاکستان پر پوځ او استخباراتي ادارو یې نیوکه کړې وه، چې ګڼ شمېر بلوچ ځوان سیاستوال یې په جبري ډول ورک کړي دي.
