له ماشومانو د ملاتړ اداره(ساحل): په پاکستان کې هره ورځ پر ۱۲ ماشومانو جنسي تېری شوی
په پاکستان کې د ماشومانو څخه د ملاتړ اداره (ساحل) وايي، چې د روان کال په لومړیو شپږو میاشتو کې په دغه هېواد کې هره ورځ په منځنۍ کچه پر ۱۲ ماشومانو جنسي تېری شوی دی.
په پاکستان کې د ماشومانو څخه د ملاتړ اداره (ساحل) وايي، چې د روان کال په لومړیو شپږو میاشتو کې په دغه هېواد کې هره ورځ په منځنۍ کچه پر ۱۲ ماشومانو جنسي تېری شوی دی.
په پاکستان کې پر ماشومانو د جنسي تېري او زور زیاتي پر وړاندې دغه مبارزه کوونکی سازمان په خپل نوي راپور کې ویلي، چې د روان کال په لومړیو شپږو میاشتو کې پر ۲۲۲۷ ماشومانو جنسي تېره شوی دی.
راپور زیاتوي، چې دا شمېره تېر کال ۲۲۱۱ وه، مګر سږ کال په منځنۍ کچه هره ورځ پر ۱۲ ماشومانو جنسي تېری شوی دی.
د ماشومانو د ملاتړ دغه اداره وايي، چې په یادو ماشومانو کې یې ۱۰۲۰ کم عمره هلکان او ۱۲۰۷ یې نجونې دي.
په راپور کې راغلي، چې ښايي دا شمېره لا څو برابره زیاته وي، ځکه اکثره د جنسي تېري قضیې د کورنیو له خوا پټې ساتل کیږي.
دغه اداره په خپل راپور کې زیاتوي، چې ۷۴ سلنه د جنسي تېري قضیې په پنجاب، ۷ سلنه په اسلام اباد، ۳ سلنه په خېبر پښتونخوا او پاتې ۱۴ سلنه یې د پاکستان اړوند نورو سیمو کې ترسره شوي دي.
د دغه راپور په اړه د پاکستان حکومت په رسمي ډول څه نه دي ويلي.
د یادونې وړ ده، چې تېره میاشت هم د پاکستان په پنجاب او بلوجستان صوبو کې شپږ تنه په جلا – جلا پېښو کې د جنسي تېري په تور د پولیسو له خوا نیول شوي دي.
