د پاکستان د کورنیو چارو وزارت د نا قانونه کډوالو د ایستلو د پریکړې له اعلان سره سم، د دغه هیواد رسنیو د یکشنبې په ورځ خبر ورکړ چې پولیسو په کراچۍ ښار کې د افغان کډوالو نیول پیل کړي. ویل کېږي چې تر اوسه په کراچۍ ښار کې ۱۲۱ افغانان نیول شوي دي.
د اې ار وای پاکستانۍ رسنۍ د راپور له مخې، د کراچۍ ښار پولیسو یاد شمېر افغانان د یکشنبې په ورځ "پاکستان ته د نا قانونه ننوتلو" په تور نیولي دي.
په پاکستان کې د افغانانو د نیولو بهیر په داسې حال کې زور اخیستی چې د پاکستان د کورنیو چارو وزیر په یوه خبري کنفرانس کې وویل چې حکومت يې پرېکړه کړې چې د پاکستان په بېلابېلو ښارونو کې د «ناقانونه کډوالو» پر وړاندې کوټلي ګامونه پورته کړي.
سرفراز بګټي وويل، پاکستان د نورو هېوادونو په څېر "ناقانونه کډوال" نه شي منلی.
د سي ان ان د راپور له مخې، په تېرو نهو میاشتو کې تر اوسه لږ تر لږه ۵۳۰ افغان کډوال په پاکستان کې نیول شوي او بېرته افغانستان ته ستانه کړای شوي دي.
خو ځينې سرچينې بیا دغه شمېر تر دې څو برابره ډیر ښيي.
