په کندهار کې د طالبانو تر واک لاندې د برېښنا ریاست د شنبې په ورځ د (وږي ۱۹مه) د یوې خبرپاڼې په خپرولو سره ویلي چې د کجکې د اوبو په بند کې د اوبو د کمښت له امله د برېښنا تولید کم شوی دی. د کندهار ښاریان وايي، بيل ورکوي خو برېښنا نه لري.
په دغه خبرپاڼه کې ویل شوي چېله دې وروسته به د کندهار ښار اوسیدونکي د ۲۴ ساعتو پر ځای یواځې د ورځې له خوا ۱۴ ساعته برېښنا ولري.
دا پداسې حال کې ده چې تېره میاشت د کندهار ښار اوسیدونکو د برېښنا ریاست له لوري د برېښنا د لګښتونو د ملا ماتوونکو بیلونو په اړه هم شکایت کړی وو.
د کندهار ښاریان د هلمند د کجکي تر څنګ په دغه ښار کې د سولري برېښنا څخه ګټه اخلي.
د کندهار او هلمند ولایتونو اوسیدونکي تل د برېښنا د نا منظم ویش او د کجکې د برېښنا د تولید په فابریکه کې د تخنیکي ستونزو له امله شکایت کوي. که څه هم د یادې فابریکي ټولې تخنیکې چارې د یوې ترکي کمپنۍ په غاړه دي خو د تېرو څو کلنو وروسته همیاده ستونزه نه ده هواره شوې.
بل خوا د هلمند ولایت اته ولسوالۍ چې د یاد بند په وسیله خړوبیږي کروندګر یې سږکل د اوبو د کمښت له امله ډیر اندیښمن دي.
