د لیبیا په سیلابونو کې ۲۴۵۰ کسان مړه شوي ۱۰ زره ورک دي
د ختیځې لیبیا چارواکي وايي، چې په لیبیا کې د سختو بارانونو له امله سیلابونه راوتلي، چې تر اوسه پکې ۲۴۵۰ کسان مړه شوي او له ۱۰۰۰۰ زیات ورک شوي دي.
د ختیځې لیبیا چارواکي وايي، چې په لیبیا کې د سختو بارانونو له امله سیلابونه راوتلي، چې تر اوسه پکې ۲۴۵۰ کسان مړه شوي او له ۱۰۰۰۰ زیات ورک شوي دي.
ټاسک نیوز د ختیځې لیبیا د لومړي وزیر اسامه حماد په حواله ویلي، چې د د دانیل په نوم د مدیتراني طوفان او سختونو بارانونو له امله د دغه هېواد په بېلابېلو سیمو کې سیلابونه راوتلي دي.
راپور زیاتوي، چې په جبل الاحضر، المارج او درنا کې تر دې مهال د ښځو او ماشومانو په ګډون ۲۴۰۰ تنه مړه شوي دي، په راپور کې راغلي چې د ژغورنې ډلې لا هم د یو شمېر خلکو په ژغورلو بوختې دي.
د دغه سیلابونو له امله ګڼو ودانیو ته هم زیان اوښتی، ځینې یې په بشپړ ډول له منځه تللي او ځینې یې نیمه ویجاړې شوي دي.
تېره ورځ د لیبیا لومړي وزیر اسامه حماد هم د پېښې ځای ته سفر کړی او د قربانیانو له یو شمېر کورنیو سره یې هم لیدلي دي.
نوموړي ویلي، چې د درنا په ساحلي ښار کې زرګونه انسانان لا هم ورک دي.
تر دا مهاله د سرې مياشتې ۲۰۸۴ کسانو مړينه تاييد خو زیاته کړې یې ده، چې د وژل شويو شمېر ښايي تر دې ډېرې شي.
د سره صلیب ویاند تیمر رمضان بیا ویلي، چې تر لسو زرو پورې کسان لادرکه دي چې مرستندويه ادارې یې د موندلو کوښښ کوي.
یاد سیلابونه په لیبیا کې په وروستیو لسو کلونو کې بې ساري ګڼل شوي او ویل کیږي، چې د اوبو اندازه تر لس فوټو پورې رسېدلي دي.
