په پاکستان کې امنیتي سرچینې وايي چې د پاکستاني طالبانو یو مهم قوماندان پاچا خان محسود د تېرې یکشنبې په ورځ د افغانستان پکتیکا ولایت برمل ولسوالۍ د راډانو په کلي کې د یوه برید مهال ټپي شوی. د هغه د روغتیا په اړه کره معلومات په لاس کې نشته.
پاچا خان د ټي ټي پي د مشر نور ولي محسود "ښی لاس"بلل کېږي او د ټي ټي پي د مشر تر ټولو نورو هغو باوري کس دی.
افغانستان انټرنشنل ته امنیتي سرچنیو تر اوسه دا نه دي ویلي چې پاچا خان محسود چا په نښه کړی.
تر اوسه پورې د پاچا خان محسود د روغتیايي حالت په اړه هم کره معلومات نه دي ترلاسه شوي.
ټي ټي پي تر اوسه پورې په دې اړه څه نه دي ویلي.
په تېره اګسټ میاشت کې هم د خوست ولايت مرکز د ښار په منځ کې د یوه هوټل د ننه يوه نا څرګنده چاودنه وشوه چې لسګونو کسانو ته یې مرګژوبله واړوله.
ځينو هغه ډرون هوايي برید بللی و او وژل شوي کسان پکې د ټي ټي پي اړوند یاد شوي و.
واک ته د طالبانو تر رسېدو وروسته پاکستان په دغه هيواد کې د هرې امنيتي پیښې د پړې ګوته په کابل کې طالبانو ته نیسي او هر ځل غاښ چيچی ورته کوي.
