د پښتون ژغورنې غورځنګ مشر په اېکس پاڼه لیکلي، چې د عامو افغانانو سره زور زیاتی د زغملو نهدی او دا خبره یې ډاګیزه کړې چې په پاکستان کې د روانې نا امنۍ لامل عام افغانان نه، بلکې هغه «کسان دي چې د کابل د سقوط په خوشالۍ» کې یې هلته چای څښه.
د دغه پښتون سیاستوال غبرګون له هغې وروسته مخې ته راځي، چې د پاکستان په یو شمېر ښارونو کې یو ځلې بیا د افغان کډوالو د نېولو او ځورولو خبرونه خپاره شول.
که څه هم منظور پښتین د چا نوم نه دی اخیستی؛ خو ښایي موخه یې د هغه وخت د ای اېس ای د مشر فیض حمید سفر وي، چې تر سقوط وروسته په سملاسي توګه یې کابل ته سفر کړی و.
له کراچۍ وروسته تېره ورځ په پلازمېنه اسلام اباد کې هم یو شمېر افغان کډوال پولیسو نیولي او یو شمېر یې بندیان کړي هم دي.
تر دې وړاندې پاکستاني رسنیو د پولیسو لهخوا داسې خبرداریانې خپرې کړې وې، چې د پاکستان په ټولو لویو ښارونو کې به هغه بهرني وګړي نیسي او شړي به یې چې قانوني اسناد و نه لري.
یو شمېر افغان کډوال چې پاسپورټونه او وېزې هم لري؛ خو د وېزو وخت یې پای ته رسېدلی.
سره له دې چې د نویو وېزو د تر لاسه کولو لپاره یې غوښتنلیکونه هم سپارلي؛ خو تر اوسه هغوی ته وېزې نه دي ورکړل شوي.
دغه افغان کډوال چې بهرنیو هېوادونو ته یې د تګ چارې روانې دي، وایي:«نه پوهیږي چا ته وژاړي او له چا نه مرسته وغواړي.»
دوی وېره لري چې بېرته هېواد ته په ستنېدو سره یې بهر ته د کډوالي چارې نېمګړې پاتې کېږي او هم په افغانستان کې د دوی ژوند ته جدي ګواښونه هغه نور څه دي، چې دوی یې هک حیران کړي دي. دوی له ملګرو ملتونو او مرستندویه هېوادنو غوښتنه کوي، چې د دوی د مهاجرت د کېسونو بهیر دې ګړندی کړي او هم دې په کوربه هېواد دا فشار راوړي، چې دوی ته د لنډ مهال لپاره په خپل هېواد کې پناه ورکړي.