د کاناډا د بهرنیو چارو وزیره چې په مونټرال کې د لاریون په پر مهال د ایرانیانو سره یو ځای شوې وه، په یوه ټویټ کې د ښځو د غورځنګ د ملاتړه خبره وکړه. دغو کاناډايي چارواکو ويلي تر خپل وس پورې به له مبارزو ایرانیانو سره دریږي.
ملاني جولي وویل: «موږ به د ایران د رژیم د لوړ پوړو چارواکو بندیزونو ته دوام ورکړو او هڅه به وکړو چې دا رژیم د ترهګرۍ رامنځته کولوپه نوم وپیژنو.»
د ایرانیانو لاریونونه د کاناډا په ټورنټوو مونټرال، اوټاوا، ګالګري، ونکوور، ویکتوریا او اډمونټن کې تر سره شوي.
د کورنیو چارو، ماشومانو او ټولنیزې پراختیا وزیرې جینا سادز او د کاناډا د کډوالۍ، پناه غوښتنې او تابیعت وزیر مارک میلر هم په اوټاوا کې د ایرانیانو په لاریون کې ګډون او ویناوې وکړې.
سادز له هغه ښځو او نجونو سره خپله خواخوږي څرګنده کړه چې د ایران او د «بشري حقونو په وړاندې د بې رحمه بې غورۍ په وړاندې» په ځواکمنه توګه مقاومت کوي. او ایرانیانو ته يې په خطاب کې وویل: «موږ د دغه غورځنګ د کلیزې او د مهسا امیني په بې رحمۍ وژنې غم له تاسو سره ولاړ یوو.»
د کاناډا د کورنیو چارو وزیر وویل چې د ښځو حقونه بشري حقونه دي او زیاته یې کړه چې اوټاوا چې کوم څه په خپل واک کې لري د ایران د حکومت د ځواب ورکولو لپاره به يې وکاروي.
مهسا (ژینا) امیني د تیر کال د وږي د میاشتې په ۲۵ نیټه د تهران د ارشاد ګزمې د افسرانو په بند کې ووژل شوه.
د دغې ایرانۍ کردۍ نجلۍ وژنې په هېواد کې دننه او بهر د ایرانیانو له خوا لاریونونه را وپارول چې څو میاشتې یې دوام وکړ.
بل خوا د ایران حکومت د مهسا امیني د مړینې د تلین د را رسیدو په مناسبت د ایران په بېلابېلو ښارونو کې کلک امنیتي تدابیر نیولي دي. خو له دغو ګامونو سره سره د شنبې په ورځ د ایران بېلابیل ښارونه د پراخو ولسي لارینونو شاهدان وو.
