د تونس پولیسو د الوتکو او ترهګرۍ ضد ځواکونو په ملاتړ سلګونه کډوال ونیول او د دوی بېړۍ یې ضبط کړې. د انساني قاچاق پرضد دا عملیات پرون سفاکس سمندرغاړه کې شوي چې اروپا ته د کډوالو د تګ یوه مهمه لار بلل کېږي.
د تونس د کورنیو چارو وزارت وايي دا عملیات یې د دغه هېواد د ولسمشر په غوښتنه د بې قانونه کډوالو پرضد کړي دي.
چارواکي او خلک وايي، د تونس ملي ګارډ پر هغو کورونو چاپې اچولې چې سلګونه کډوال پکې پاتې کېد، دوی هغه لارۍ او کښتۍ هم ضبط کړې چې د دې کډوالو د قاچاق لپاره کارېدې.
ویل کېږي په نیول شویو کسانو کې څو قاچاقبر هم دي.
د دې سلګونو کډوالو نیول په داسې مهال دي چې د ایټالیا لامپدوسا ته تېره اونۍ تر اوو زرو کډوال له شمالي افریقا په کښتیو کې ور ننوتل.
روان کال تراوسه ایټالیا ته یو لک ۲۶ زره بې قانونه کډوال ننوتلي، خو تېر کال دا شمېر ۶۴ زره ۵۲۹ کسان وو.
د ایټالیا لومړۍ وزیرې جورجیا ملوني د جمعې په ورځ له اروپايي ټولنې وغوښتل، چې د اړتیا پر مهال دې د مدیترانې سمندرګي له لارې د شمالي افریقا د کډوالو د مخنیوي لپاره یو سمندري ماموریت جوړ کړي.
