په داسې حال کې چې لسګونه استادان د طالبانو له خوا په زور منفک شوي، د طالبانو د لوړو زده کړو وزارت سرپرست وزیر وايي، چې افغانستان ته د پوهنتونونو د استادانو د بیا راګرځولو لپاره یې بېلابېل پلاوي بهرنیو هېوادونو ته لېږلي دي، تر څو د پوهنتون استادان بېرته افغانستان ته راستانه کړي.
ندا محمد ندیم دا خبرې په داسې مهال کوي، چې په تېرو دوو کلونو کې له یو شمېر پوهنتونونو څخه ځینې استادانو استعفاوې کړي او بهرنیو هېوادونو ته تللي، ځینې یې په زور منفک شوي او یا هم ګواښل شوي دي.
طالبانو هغه استادان چې د علمي کادر په حفظ سره یې په حکومتي ادارو کې د اړتیا له مخې دندې سرته رسولې، منفک کړي او بېرته د پوهنتون له استادۍ څخه منع کړي دي.
ندا محمد ندیم په بلخ ولايت کې يوې غونډې ته د وينا پر مهال ویلي، چې پوهنتونونو ته د بهرنيو هېوادونو د استادانو د ګومارلو هڅې هم روانې دي.
نديم وويل: "موږ بېلابېلو هېوادونو ته بېلابېل پلاوي لېږلي، تر څو بهر مېشتي استادان بېرته هېواد ته راستانه شي."
نوموړي د طالبانو د ګومارنو په اړه ویلي، چې د دغې ډلې مشر ملا هبت الله په ګومارنو کې ژبې، قوم او سمت ته پام نه کوي، بلکې ټولې ګومارنې د تقوا او اهلیت پر اساس کوي.
خو په طالبانو نیوکه ده، چې د افغانستان په ټولو اداراتو کې یې ملایان او د دغې ډلې غړي مقرر کړي دي، مسلکي او په کارپوه خلک یې له دندو لرې کړي او اکثرو یې هېواد پرېښی دی.
نړۍوالې ټولنې هم د طالبانو حکومت د یوې ډلې حکومت ګڼلی او بار – بار یې د یوه ټولګډونه حکومت وړاندیز کړی دی؛ خو طالبان بیا خپل حکومت یو ټولګډونه حکومت ګڼي.
