پاکستان کې د پولیسو او وسلوالو تر منځ په نښته کې درې تنه وژل شوي
پاکستاني رسنیو د چارواکو په حواله خبر ورکړی، چې لسګونو وسله والو په "میانوالې" کې د پولیسو پر یوې پوستې برید کړی، چې په پایله کې یې یو پولیس او دوه بریدګر وژل شوي دي.
پاکستاني رسنیو د چارواکو په حواله خبر ورکړی، چې لسګونو وسله والو په "میانوالې" کې د پولیسو پر یوې پوستې برید کړی، چې په پایله کې یې یو پولیس او دوه بریدګر وژل شوي دي.
پاکستاني پولیسو رسنیو ته ویلي، چې برید کوونکي د تحریک طالبان پاکستان غړي وو، د شنبې په شپه یې برید پیل کړی و او د یکشنبې په سهار پای ته ورسېد.
تر دا مهاله د یادې پېښې په تړاو د پاکستاني طالبانو ډلې څه نه دي ویلي.
د یادونې وړ ده، چې د پاکستان د امنیتي څېړنو او مطالعاتو مرکز په یوه راپور کې لیکلي، چې له وسله والو سره په جګړه کې د دغه هېواد د امنیتي ځواکونو مرګ ژوبله په تېرو اتو کلونو کې تر ټولو لوړې کچې ته رسېدلې ده.
د دغه مرکز د شمېرو له مخې؛ په تېرو ۹ میاشتو کې د پاکستان د امنیتي ځواکونو ۳۸۶ غړي وژل شوي دي.
ویل کیږي، چې په دغو کې ۱۳۷ تنه د اردو سرتیري دي.
په افغانستان کې د طالبانو د بیا واک ته له رسېدو وروسته په پاکستان کې ترهګریز بریدونه زیات شوي دي.
