برازيل وايي، هغه مهال به د افغانانو لپاره لنډمهاله ویزې ورکړي چې د هېواد پنډغالي د کډوالو د مېشتېدو لپاره تش شي. نیوکه کوونکي وايي، دا کړنلاره ښايي افغان کډوال د اضافي اداري خنډونو په رامنځته کولو سره له ډېرو زیان منونکو حالاتو سره مخامخ کړي.
د برازیل دولتي اژانس په وینا، د دغه هېواد د عدلیې، عامه امنیت او بهرنیو چارو وزارتونو په یوه ګډه خبرپاڼه کې ټینګار کړی، چې د دوی موخه «په خوندي او منظم ډول د افغان کډوالو منلو ته وده ورکول دي.»
د برازیل حکومت وايي، چې برازیل ته له ننوتلو وروسته په منظم او باعزته توګه د پناه غوښتونکو د بیا ځای پرځای کولو هوډ لري.
دې پرېکړې په برازیل کې د پناه غوښتونکو افغان کډوالو د احتمالي اغېز په اړه پوښتنې راپورته کړې دي.
وړاندې تر دې به افغان کډوالو په مسکو، انقره، دوحه او ابوظبۍ کې د هغه هېواد سفارتونو ته د تللو نه وروسته د ویزې غوښتې کولای شوای؛ خو د نوې پرېکړې له مخې اوس یوازې په تهران او اسلام اباد کې د دغه هېواد په سفارتونو کې د ویزې غوښتنې کولای شي.
کتونکي په دې باور دي، چې دغه ګام کېدای شي د کډوالۍ په سیسټم کې فساد لا پسې زیات کړي او ممکن د وخت په تېرېدو سره د اداري خنډونو د کمولو پر ځای ناقانونه کډوالۍ ته هم لاره هواره کړي.
