د طالبانو د سوداګرۍ او صنایعو وزارت په کابل کې د سیرومو د تولید د یوې لویې فابریکې د پرانیستلو خبر ورکړ. د دغه وزارت چارواکو په جوړې شوې غونډه کې وویل، دغه فابریکه چې په ورځ کې د بېلابېلو طبي سیرومونو د ۱۱۰ زره کڅوړو د تولید وړتیا لري، د ۲۵ میلیونو ډالرو په لګښت جوړه شوې ده.
د سیروم دغه فابریکه چې د کابل په څرخي پله صنعتي پارک کې جوړه شوې، څه باندې زرو تنو ته یې کاري فرصتونه هم برابر کړي دي.
د صنعت او سوداګرۍ وزارت مرستیال قدرت الله جمال په غونډه کې د وینا پرمهال وویل چې، خصوصي سکټور د هېواد په اقتصادي پرمختګ کې رغنده رول لري او د سلګونو هېوادوالو لپاره یې کاري زمینه برابره کړې ده.
نوموړي ټینګار وکړ چې، د هېواد د اقتصادي پرمختګ لپاره افغانان باید له کورنیو تولیداتو استفاده وکړي.
اوسمهال چې په هېواد کې صنعتکاران د ځمکو د وېش او د برېښنا جدي کمښت له ستونزو سره مخ دي، ښاغلي جمال ډاډ ورکړ چې په نږدې وخت کې به دغه ستونزه هواره کړي.
افغانستان له کلونو راهیسې د خپلې اړتيا وړ ډېر درمل له بهره واردوي او خلک تل شکايت کوي، چې له ګاونډیو هېوادونو بې کیفیته درمل هېواد ته واردېږي.
