په هرات کې له زلزلې وروسته د طالبانو والي اعلان وکړ، چې په دغه ولایت کې له لسو زیات کلي ویجاړ شوي دي. د طالبانو رسمي شمېر ښيي، چې په دې زلزله کې ۳۰ کسان مړه او تر ۶۰ډېر ټپیان دي، خو ځايي سرچینې وايي چې د قربانیانو شمېر تر دې هم لوړ دی.
د راپورونو له مخې د هرات ولایت د زنده جان ولسوالۍ د نایب رفیع، سیاه اب، وردکها، کرنیل، سربلند، چاهک، سنجاب او کشکک کلي ویجاړ شوي دي.
په هرات کې د طالبانو والي نوراحمد اسلامجار وايي، چې د دغې ډلې هوايي ځواکونو د هرات د عامې روغتيا روغتون ته ځینې ټپيان لېږدولي دي.
ښاغلي اسلام جار د درملپلورونکو له اتحادیې وغوښتل، چې ټپیانو ته د لا زیاتې پاملرنې لپاره د هرات روغتون اړتیاوې پوره کړي.
د هرات ولايت له طبيعي پيښو سره د مبارزې رييس له باختر اژانس سره په خبرو کې د ټپیانو شمېر له شپږ سوه کسانو ډېر ښودلی.
د طالبانو تر کنټرول لاندې دغه خبري اژانس ته د هرات په حوزوي روغتون کې ځینو سرچینو د ۳۰ تنو د مړه کیدو خبر تایید کړی دی.
د شنبې په ورځ د تلې په ۱۵مه، د افغانستان شمال لوېدیځ د ۶،۳ درجې په کچه یوې زلزلې ولړزاوه.
د امريکا د ځمکې پیژندنې مرکز ويلي، چې د هرات ولایت د زنده جان ولسوالۍ د دغې زلزلې مرکز و.
