فرانس خبري اژانس وايي، د افغانستان لوېدیځ ته په هرات ولایت کې د شنبې ورځې د زلزلې له امله ۱۴ کسان مړه او ۸۷ ټپیان شوي دي. خو د طالبانو له طبیعي پېښو سره د مبارزې وزارت ویاند ملا جان سایق وایي، دې لزله کې ۱۵ کسان مړه او ۴۰ ټپیان شوي دي. په ورته مهال زیاتوي چې دا لومړنۍ شمېرې دی.
نوموړی وايي، دې زلزلې په فراه او بادغېس کې هم ډېر کورونه ویجاړ کړي دي، خو د مرګ ژوبلې راپور لا تراوسه نشته.
هرات کې د طالبانو د والي ویاند هم وايي، دې زلزلې «ډېر مالي او ځاني تاوان» اړولی او لسګونه ټپیان یې د هرات حوزوي روغتون ته لېږدول شوي دي.
نثار احمد الیاس د ویډیو خپرولو سره ویلي چې زلزله سهار نږدې یوولس بجې وشوه او پر هرات ښار سربېره یې ولسوالۍ هم ولړزولې.
نوموړی وايي، طالبان زلزله ځپلو ته د رسیدګي لپاره چمتو دي.
د شنبې په ورځ د ۶.۳ درجې په اندازه زلزلې د هرات په ګډون د افغانستان لوېدیځ ته جټکه ور کړه.
دغې زلزلې له افغانستان سره پر پوله د ایران دوه ولایتونه هم لړزولي دي.
لا هم په افغانستان کې د دې لزلې د مرګ ژوبلې او تاوان کره شمېر مالوم نه دی، خو د خواله رسنیو ځینې کارنو د هرات د جامع جومات او ځینې کورونو انځورونه خپاره کړي دی.
په انځورونو کې لیدل کېږي چې د جومات یوه مناره کې هم چاود شوی او کاشي یې هم غورځېدلې ده.
د هرات تر څنګ دغه ټکانونه د فراه او بادغیس په ولایتونو کې هم احساس شوي او خلک یې وېرولي دي.
په یو شمېر انځورونو کې ښکاري چې ځينې کورونه او ودانۍ راپرېوتي؛ خو د مرګ ژوبلې په اړه کره معلومات تر دې مهاله نه دي تر لاسه شوي.
یوې سرچینې افغانستان انټرنشنل ته ویلي، چې یو شمېر ټپيان د هرات حوزوي روغتون ته لېږدول شوي دي.
دا رنګه د ایران په خراسان رضوي کې هم د دغې زلزلې ټکانونه محسوس شوي او هلته یې هم ځينې ودانۍ زیانمنې کړې دي.
په دې اړه د شېبه په شېبه تازه معلوماتو لپاره زموږ سره پاتې شئ.