د کرېکټ په نړۍ کې غوره توپ اچونکی او د افغانستان د کرېکټ ملي لوبغاړی راشد خان وايي، د افغانستان په لویدیځو ولایتونو هرات، فراه او بادغیس ولایتونو کې د زلزله ځپلو سره د مرستو راټولولو کمپاین پيلوي.
نوموړي پر خپل ایکس پاڼه لیکلي «په هرات، فراه او بادغیس ولایت کې د زلزلي له امله له اغیزمن شویو خلکو سره د مرستې لپاره د روان نړیوال جام ټولو لوبو معاش ورکوم.»
راشد خان لیکلي دي، چې ډير ژر به د مرستو را ټولولو کمپاین هم پیل کړي.
د راشد تر څنګ د افغانستان د کرېکټ ملي لوبډلې پخوانی لوبډلمشر اصغر افغان هم په هرات کې د زلزله ځپلو سره د مرستو را ټولولو په پار د کرېکټ له نړیوالې شورا څخه غوښتنه کړې چې د کرېکټ په نړیوال جام کې د هرات د زلزله ځپلو لپاره په مرستو راټولولو کې د نړۍ د کرېکټ ستوري وهڅوي.
د شنبې په ورځ د تلې په ۱۵مه د افغانستان شمال لوېدیځ د ۶،۳ درجې په کچه یوې زلزلې ولړزاوه. د امریکا د ځمکپیژندنې سروې ادارې ویلي چې د دې زلزلې مرکز د هرات ولایت د زنده جان ولسوالۍ وه.
د وروستیو شمېرو له مخې په هرات کې د زلزلې له امله د مړو شمېر دوه زره او ۵۳ تنو ته ورسېد.
د طبیعي پېښو پر وړاندې د مبارزې وزارت ویاند ملاجانان فایق نن په یوه خبري غونډه کې وویل چې د لومړنیو شمېرو له مخې په هرات کې د تېرې ورځې په زلزله کې څه باندې ۲ زره ۵۳ تنه وژل شوي او شاوخوا ۹ زره ۲۴۰ تنه ټپیان شوي دي.
د هغه په وينا، د دې زلزلې ډېرى قربانيان د هرات د زنده جان ولسوالۍ په ١٣ کليو کې دي.
ده وويل چې ١٣٢٠ کورونه ويجاړ شوي دي.
دا شمېرې وروستۍ نه دي او شېبه شېبه د مړو او ټپیانو شمېرې لوړيږي.
