د جاپان د بهرنیو چارو وزیره: هڅه کوو د هرات د پېښې له قربانیانو سره بېړنۍ مرستې وکړو
د جاپان د بهرنیو چارو وزارت په هرات کې د وروستۍ پېښې له امله د ژورې خواشينۍ تر څنګ ویلي، چې هڅه کوي له زلزله ځپلو سره چټکې او بېړنۍ مرستې وکړي.
د جاپان د بهرنیو چارو وزارت په هرات کې د وروستۍ پېښې له امله د ژورې خواشينۍ تر څنګ ویلي، چې هڅه کوي له زلزله ځپلو سره چټکې او بېړنۍ مرستې وکړي.
د جاپان د بهرنیو چارو وزیر یوکو کامیکاوا نن یکشنبه (د تلې ۱۶مه) په یوې اعلامیې کې ویلي دي؛ جاپان چمتو دی چې د نړۍوالو مرستندویه ادارو په مرستې په “چټک ډول” اړینې مرستې چمتو کړي.
یوکو کامیکاوا زیاتوي، چې دا مهال د هرات زلزله ځپلي عاجلې مرستې ته اړتیا لري او دوی د خپلې همکارۍ په اساس کولی شي، چې اغېزمنو سیمو او خلکو ته عاجلې مرستې ور ورسوي.
هغې زیاته کړې: “ جاپان د افغانستان د خلکو تر څنګ ولاړ دی او موږ به په افغانستان کې د بشري وضعیت د ښه کېدا لپاره خپلو هڅو ته دوام ورکړو”.
نوموړې دغه پېښه بوږنوونکې بللې او په نورو مرسته کوونکو یې هم غږ کړی او یو ځل بیا یې د جاپان پر همکارۍ ټینګار کړی دی.
دا مهال په کور دننه او بهر یو شمېر سوداګرو، مرستندویه بنسټونه او د طالبانو ریاست الوزرا د هرات د زلزله ځپلو سره د مرستو اعلانونه شوې دي.
په ورته وخت کې د ایران مرستندویې ډلې هرات ته رارسېدلي او د ځایي خلکو سره یو ځای د ورکو شویو کسانو په لټه بوختې دي.
تر دا مهاله د هرات د پېښې د مرګ ژوبلې دقیقه شمېره نه ده روښانه شوې، خو د اټکل له مخې د مرګ ژوبلې کچه زرګونو ته رسېدلې ده.
