په جوماتونو کې د زلزلې د کېدو له اعلان وروسته په مزارشریف کې ویره خپره شوې
د بلخ اوسېدونکو وروسته له هغه چې جوماتونو د یوې "خطرناکې زلزلې" خبرداری ورکړ، شپه یې په سړکونو او پارکونو کې سرګردانه تېره کړه.
د بلخ اوسېدونکو وروسته له هغه چې جوماتونو د یوې "خطرناکې زلزلې" خبرداری ورکړ، شپه یې په سړکونو او پارکونو کې سرګردانه تېره کړه.
افغانستان انټرنشنل ته څو ویډیوګانې رسېدلي، چې د بلخ مرکز مزارشریف او دهدادي ولسوالۍ یو جومات د یکشنبې په شپه د لاوډ سپیکر له لارې د "خطرناکې زلزلې" خبرداری ورکوي.
د مزارشريف له ښار څخه په نورو جلا ويډيوګانو کې ليدل کېږي، چې د دې ښار اوسېدونکي د ماشومانو او ښځو په ګډون د يکشنبې په شپه (د مېزان ١٦مه) د زلزلې له وېرې پر سړکونو تېروي.
د بلخ ولايت لږ تر لږه اوو تنو اوسېدونکو په جلا - جلا توګه له جوماتونو څخه د زلزلې د اعلانونو د خپرېدو او د مزارشريف ښار د اوسېدونکو ترمنځ د وېرې د خپرېدو خبر تاييد کړ.
دا اوازې یوازې په بلخ ولایت کې نه وې خپرې شوې، بلکې په کندهار او هلمند ولایتونو کې هم ورته اوازې خپرې شوې وې، چې ګواګې د شپې دوه بجې زلزله کیږي، چې په خلکو کې یې سخته وېره خپره کړې وه.
په ټولنیزو رسنیو کې یوه وېډیو خپره شوې، چې په کندهار ښار کې طالبانو دوه تنه نیولي چې د زلزلې اوازې خپرولې.
دا اوازې د افغانستان په لویدیځ کې د شنبې د ورځې له خونړۍ زلزلې وروسته خپرې شوې دي.
د شنبې په ورځ (د میزان ۱۵مه) د هرات ولایت په زنده جان ولسوالۍ کې زلزلې سلګونه کسان مړه او ټپیان کړل.
