د طالبانو د پېښو ته رسېدو وزارت اعلان وکړ، چې په هرات کې د دوشنبې ورځ (د میزان ۱۷مه) د زلزلې له امله څلور زره تنه مړه او ټپيان شوي دي. د دې وزارت چارواکو په کابل کې په یوه خبري غونډه کې وویل، چې د هرات په ۲۰ کلیو کې ۱۹۸۳ کورونه "په بشپړه توګه" ویجاړ شوي.
طالبانو یو ځل بیا د هرات په زلزله کې د مړو او ټپیانو شمېرې سره نه دی جلا کړي.
د دوشنبې په ورځ (د میزان ۱۷مه) په کابل کې له یوې خبري غونډې وروسته د طالبانو د پېښو ته رسېدو وزارت په یوه خبرپاڼه کې لیکلي، چې د زلزلې په ځای کې ۳۵ ملي او نړۍوالې د پلټنې او ژغورنې ډلې موجودې وې.
طالبانو ویلي، چې د دې ډلې د مشر هبت الله اخندزاده په استازیتوب یو پلاوی هم هرات ته تللی او له زلزله ځپلو سره یې د مرستې ژمنه کړې ده.
طالبانو ویلي، چې د ژغورنې عملیات لا هم روان دي.
د طالبانو په وینا؛ د ایران د اسلامي جمهوریت تخنیکي ټیم هم له زلزله ځپلو سیمو څخه لیدنه کړې ده.
د دغې اعلاميې له مخې؛ چين، جاپان، ايران، پاکستان، اروپايي ټولنې او د روغتيا نړۍوال سازمان د هرات له زلزله ځپلو سره د نغدو پيسو، خوراکي توکو او طبي مرستو ژمنه کړې ده.
طالبانو ویلي، چې هرات ته د ایران او ترکیې مرستې رسېدلې دي.
د دې خبرپاڼې پر بنسټ؛ د خوست، کندهار، پکتيا، نيمروز، ننګرهار، وردګو او فراه خلکو هم اعلان کړى، چې هرات ته به نغدي، خوراکي او غير خوراکي مرستې ولېږدوي.
طالبانو دا هم ویلي، چې یو شمېر خیریه بنسټونو، سوداګرو او "یو شمېر محدودو پاکستاني شخصیتونو" د هرات له زلزله ځپلو سره څه باندې ۳۲ میلیونه او ۳۵۰ زره افغانۍ مرسته کړې ده.
په خبرپاڼه کې راغلي، چې د طالبانو د ریاست الوزرا د دفتر له خوا د هرات د زلزلې له قربانيانو سره سل ميليونه افغانۍ هم مرسته شوې ده.
عزیزي بنسټ هم له زلزله ځپلو سره د مرستې لپاره ۲۰۰ میلیونه افغانۍ ځانګړې کړې دي.
