وروسته له هغې چې د حماس او اسراییل تر منځ د جګړې اور ګرم شو، د امریکا د بهرنیو چارو وزیر اسراییل ته سفر وکړ او نوموړي نن پنجشنبه (د تلې ۲۰مه) تل ابیب ته د خپل سفر په ترڅ کې د حماس برید "غیر انساني او ظالمانه" وباله او دغه ډله یې له داعش څخه بدتره وبلله.
نوموړي د حماس د کړنو په غندلو سره ویلي، چې امریکا به هېڅکله د اسراییل په ملاتړ کې پاتې را نه شي.
دغه جګپوړي امریکايي چارواکي د اسراییل له لومړي وزیر بنیامین نتنیاهو سره په یوه خبري غونډه کې له دغه هېواد سره د واشنګټن پر ملاتړ ټینګار وکړ.
دا غونډه په داسې حال کې کېږي، چې متحده ایالات غواړي د هغو امریکايي اتباعو په ګډون چې د حماس له خوا د غزې په تړانګه کې د تېرې اونۍ د حملې په ترڅ کې برمته شوي وو، په ازادۍ کې خپله مرسته او ملاتړ څرګند کړي.
د ښاغلي بلینکن له سفر سره سم د سوریې پوځي چارواکو اعلان وکړ، چې د دغه هېواد د پلازمېنې دمشق او د شمالي ښار حلب پر هوايي ډګرونو د اسراییل د توغندیو د بریدونو په نتیجه کې دواړه هوايي ډګرونو خپل فعالیتونه ځنډولي دي.
له کلونو راهیسې اسراییل په سوریه کې د حلب او دمشق د هوايي ډګرونو په ګډون په ایران پورې په تړلو اهدافو باندې بریدونه کوي.
اسراییل پر ایران تور لګوي، چې له هغو ډلو سره چې دوی یې ملاتړ کوي وسله واله مرسته کوي.
د یوې اسراييلۍ ورځپاڼې د راپور له مخې؛ د ماهان هوايي شرکت يوه ايرانۍ الوتکې د سوريې د دمشق او حلب پر هوايي ډګرونو تر بمبارۍ وروسته خپله لاره بدله کړه او تهران ته ستنه شوه.
سانا خبري اژانس د سوریې د پوځي سرچینې په حواله وایي، چې په هم مهاله توګه دوه توغندي په دوو هوايي ډګرونو لګېدلي دي، چې د دې سرچینې په وینا دا یوه هڅه وه چې د نړۍ پام په غزه کې د حماس وسله والو سره د اسراییل له جګړې واړوي.
د اسراییل پوځ ویلي، چې د داسې راپورونو په اړه تبصره نه کوي.
