د پښتونخوا په مرکز پېښور کې پولیسو د دې صوبې د تعلیم پخوانی وزیر او د تحریک انصاف ګوند یو مشر کامران بنګښ ونیو. پولیس وايي، نوموړی یې څمکنیو کې په خپل کور کې نیولی او بیا یې ځايي تاڼې ته وړی دی.
د جیو نیوز د پنجشنبې ورځې د راپور له مخې، کامران بنګش له څمکنۍ تاڼې وروسته نامالوم ځای ته لېږدول شوی دی.
پولیسو دا نه دي ویلي چې کامران بنګښ یې ولې نیولی دی.
د نوموړي خلاف د مۍ د نهمې او لسمې د پېښو اړوند دوسیې په تاڼو کې درج شوې وې، خو په ځینې کېسونو کې یې له نیول کېدو مخکې ضمانت شوی و.
امریکايي چارواکي وايي، په عراق او سوریه کې یې دې وروستیو ورځو کې بیابیا پر ځواکونو بریدونه شوي دي. د حماس او اسراییل ترمنځ د جګړې زیاتېدو سره، په سیمه کې امریکايي ځواکونه د ایران ملاتړو سیمه ییزو وسلوالو د فعالیت زیاتېدو له امله تیارسي شوي دي.
د امریکا ولسمشر جو بایډن دوه اونۍ وړاندې منځني ختیځ ته دوه الوتک وړونکې، جنګې بېړۍ او تر دوو زرو سمندري ځواکونه واستول.
د اکتوبر پر ۷ پر اسراییل د حماس له برید وروسته په سیمه کې پر امریکايي ځواکونو هم بریدونه زیات شوي دي. د چارشنبې په ورځ سوریه کې یوه ډرون پر امریکايي اډې سره ټکر شوه چې لږ تاوان یې ورساوه او بله هم وغورځول شول.
د عراق په الاسد اډه کې هم د دروغجن ارنګ له امله د یوه ولسي قراردادي زړه وچاود.
د عراق لوېدیځ کې پرون هم د امریکا او نړیوالو ځواکونو پر دوو اډو د ډرون او توغندیو برید شوی دی.
د عراق پولیس وايي، پرون بغداد کې هم د امریکا پوځي اډه باندې توغندیز بریدشوی دی، خو نور مالومات یې نشته.
د امریکا جنګۍ بېړۍ چې پرون د یمن له اوبو سره نږدې روانه وه څو توغندي او ډرون یې شنډ کړي دي.
د امریکا دفاع وزارت وايي، دا توغندي او ډرونونه د ایران ملاتړو حوثي وسلوالو و او ښايي اسراییل یې په نښه کړی و.
د پنټګان ویاند برید جنرال پټریک ریډر وايي، دې بریدونو ته د کوم ممکنه غبرګون وړاندوینه نه کوي، خو د امریکايي او ایتلافي ځواکونو پرضد هر ګواښ د مخنیوي لپاره به ټول اړین ګامونه پورته کړي.
د اکتوبر پر اومه د حماس له برید وروسته چې اسراییل وايي، ۱۴ سوه کسان یې پکې وژل شوي تل ابیب پر غزه بریدونه پیل کړي دي.
په دې بریدوڼو کې نږدې څلور زره فلسطنیان وژل شوي او تر ۱۲ زرو ډېر ټپي شوي دي.
د پنټګان ویاند ریډر په سیمه کې پر امریکايي ځواکونو بریدونه د حماس او اسراییل جګړه پورې تړلي نه بولي.
خو د عراق شیعه مذهبي مشر ایت الله علي سیستاني پر غزه د اسراییل د بریدونو له غندلو سره له نړۍ غوښتي چې د دې وحشت په مقابل کې یوموټی شي.
د ایران نږدې ملاتړې او ځواکمنې وسلوالې ډلې کتایب حزب الله هم امریکا د بې ګنا خلکو په وژلو کې د اسراییل پر ملاتړ تورنه کړې او ترې غوښتي یې دي چې له عراق ووځي.
تېرو کلونو کې هم د ایران ملاتړو وسلوالو په عراق کې بیا بیا پر امریکايي ځواکونو سربېره د دغه هېواد پر سفارت هم راکټي بریدونه کړي دي.
امریکا په عراق کې دوه نیم زره او سوره کې نهه سوه سرتېري لري او ځايي ځواکونه د اسلامي دولت ضد روزي او ملاتړ یې کوي.
په نوي زیلنډ کې د ۵۱ وژل شویو مسلمانانو د پېښې په هکله پلټنې راتلونکې سې شنبه پیلېږي. پر ۲۰۱۹ کال یوه توندلاري د کریسچرچ ښار پر دوو جوماتونو په برید کې دا کسان ووژل او لسګونه نور یې ټپي کړل. دا برید د نوي زیلنډ په تاریخ کې تر ټولو مرګونې پېښه بلل کېږي.
نوی زیلنډ له دې پلټنې سره دا نتیجه اخیستل غواړي چې له برید وروسته څه وشول او راتلونکي کې د ورته پېښو مخنیوی څنګه کېدلی شي.
د برنټن تارنټ په نوم ۳۲ کلن اسټرالیايي چې په نیمه اتومات وسلو سمبال و، د ۲۰۱۹ کال د مارچ پر ۱۵ پر مسلمانو عبادتګرو برید وکړ او ۵۱ کسان یې ووژل او لسګونه نور یې ټپیان کړل.
تارنټ په کریسچرچ ښار کې پر النور جومات او لېن ووډ اسلامي مرکز له برید لږ مخکې توکمپالې څرګندونې خپرې او خپل برید یې هم پر فیسبوک ژوندی خپور کړ.
دا پلټنې د اکتوبر پر ۲۴ پیلېږي او لومړی پړاو یې شپږو اونیو کې بشپړېږي چې لس مسلې پکې څېړل کېږي؛ لکه پېښې ته د بېړنۍ ادارې او روغتیاپالو ځواب، له تارنټ سره بل چا هم مخامخ مرسته کړې او د هر قرباني د مړینې لامل.
دا پلټنې قانوني بهیر دی چې د نوي زیلنډ قانون یې د ناڅاپي مرګ د ارزونې لپاره لازمې بولي او پکې د طبي پلټونکو، پولیسو، لومړنیو ځواب ویونکو او د پېښې د شاهدانو نظریې ټولېږي.
د عدلي طب محکمې هم په خپله وېبپاڼه کې لیکلي: «دا قانوني پلټنې د حقیقت موندلو لپاره ګډ بهیر دی او د دې لپاره کېږي چې د راتلونکي لپاره په ورته شرایطو کې د پېښو د مخینیو لپاره سپارښتنه ترلاسه شي.»
دوی زیاتوي چې دغو پلټنو سره کومه سزا یا جرمانه نه پلې کېږي.
تارنټ د ۵۱ کسانو د وژلو او ۴۰ نور ټپي کولو په جرم په عمر بند محکوم شوی دی.
هغه له دې پېښې وروسته ویلي وچې غوښتل یې پر دریم جومات هم برید وکړي او له برید وروسته جوماتونه وسوځوي.
د امریکا د دفاع وزارت وايي، چې د چین په اټومي بټیو کې د تمې خلاف چټک پرمختګ ښکاري او د تېر کال په پرتله یې اټومي وسلې زیاتې شوي دي. دوی وايي، چې چین د دغو وسلو د کارونې په موخه ځانګړي ځایونه هم جوړ کړي.
د چین د پوځي ځواک د کلني راپور په اړه چې نن پنجشنبه ( د تلې په ۲۷مه) خپور شوی، د امریکا د دفاع وزارت اندېښنه ښودلې او ویلي دي، چې د تېرې می میاشت پورې چین نېږدې ۵۰۰ اټومي وسلې لرلې مګر دا شمېره د روان کال تر پایه ۱۰۰۰ ته رسیږي.
دا په داسې حال کې ده، چې امریکا د تېر کال په نومبر کې اټکل کړی و، چې چین ۴۰۰ اټومي وسلې لري او شمېر به یې تر ۲۰۳۵ کال پورې ۱۵۰۰ ته ورسیږي.
امریکايي چارواکو د چین د اټومي وسلو د چټکې پراختیا په اړه اندېښنه څرګنده کړې او ویلي یې دي، چې دا چټک پرمختګ حیرانوونکی دی.
د امریکا د دفاع وزارت یوه لوړ پوړي چارواکي ایس بي ون نیوز ته د نوم د نه ښودلو په شرط ویلي، چې چین د اټومي وسلو د استعمال په موخه په ځمکه، فضاء او سمندر کې اډې جوړې کړي او په دغه برخه کې یې پانګونه زیاته کړې ده.
یو شمېر امریکايي رسنیو بیا د چین د اټومي وسلو د زیاتوالي په اړه په بېلابېلو بحثونو کې دا پوښتنې راپورته کړي، چې د چین د اټومي پراختیا دا چټک بدلون په کومه معنا دی؟
شننونکي بیا وايي، چې چین په راتلونکو څو کلونو کې غواړي چې د اټومي ځواک له لارې خپل پوځي قدرت دومره پیاوړی کړي، چې په سیمه او نړۍ کې د امریکا ځواک محدود کړي.
یو شمېر غربي رسنیو د چین د پوځي ځواک د راپور له خپرېدو وروسته ویلي، چې دا راپور تایوان ته د یوه ګواښ په معنا هم دی.
د چین د اټومي قدرت د چټکې پراختیا خبر د امریکا لپاره د خطر زنګ بلل شوی دی.
د اټومي وسلو د مخنیوي د تړون په اساس امریکا دا مهال ۱۵۵۰ اټومي وسلې لري او په پام کې لري، چې په راتلونکو کلونو کې نېږدې ۷۵۰ میلیارده ډالر پانګونه پرې وکړي.
د متحده ایالاتو د بهرنیو چارو وزارت تازه له هېواده بهر خپلو ټولو اتباعو ته"امنیتي خبرداری" ورکړی. امریکا له خپلو اتباعو غوښتي، چې په نړۍ کې د تاوتریخوالي د زیاتېدو او د تروریستي حملو د احتمال په پام کې نیولو سره دې ډېر احتیاط وکړي.
د امریکا د بهرنیو چارو وزارت په یوې بیانیه کې د امریکا د اتباعو او ګټو پر ضد د تروریستي بریدونو، مظاهرو او تاوتریخوالي د احتمال په اړه خبرداری ورکړی.
دا پدې معنا ده، چې د متحده ایالاتو اتباع کله چې د نړۍ نورو هېوادونو ته سفر کوي، هوښیار اوسي او د امنیتي خبرداري د ترلاسه کولو سره سمدستي باید د متحده ایالاتو حکومت خبر کړي.
په تېرو ورځو کې په داسې حال کې چې په منځني ختیځ کې کړکېچونه زیات شوي، لوېدیځو هېوادونو د امنیتي خبرداریو کچه لوړه کړې او له خپلو اتباعو یې غوښتي چې د منځني ختیځ ځینو هېوادونو ته سفر ونه کړي.
د اسراییل او حماس ترمنځ د جګړې په دیارلسمه ورځ د اسراییل د دفاع وزیر یواف ګالانټ د پنجشنبې په ورځ (د تلې ۲۷مه) وویل، چې اسراییلي سرتیري به ډېر ژر غزې ته ورننوځي.
د اسراییل د دفاع وزارت د خبر پاڼې له مخې؛ نوموړي خپلو سرتېرو ته ویلي: "تاسو اوس له لېرې څخه غزه وینئ؛ خو ډېر ژر به حکم وشي او تاسو به یې له داخل څخه ووینئ."
ګالانټ دا څرګندونې په داسې حال کې کوي، چې له دې وړاندې اسراییلي چارواکو ویلي وو، چې د ځمکني برید لپاره چمتووالی نیسي.
د اسراییل مشرانو تر دې مخکې ویلي وو، چې د حماس د له منځه وړلو لپاره به پر غزې د هوا، سمندر او ځمکې له لارې بریدونه وکړي.
دا څرګندونې په داسې حال کې شوي، چې د برېتانیا لومړي اسراییل ته د خپل سفر په ترڅ کې د دغه هېواد پر حق او د غزې له خلکو سره د بشري مرستو پر لاسرسي ټینګار کړی دی.
په ورته وخت کې د اسراییل لومړي وزیر له خپل برېتانوي سیال سره په کتنه کې ویلي، چې د حماس وروستۍ حمله له عربي هېوادونو سره د اسراییل د سوله ییزو اړیکو د پراخېدو د مخنیوي په هدف ترسره شوې ده.
بنیامین نتنیاهو د پنجشنبې په ورځ د می په ۲۷مه له برېتانیا وغوښتل چې پر غزې د اسراییل د برید ملاتړ ته دوام ورکړي.