د پېښور د قول اردو مشر تورنجنرال حسن اظهر حیات د پښتونخوا په اوکرزۍ ضلعه کې د سیلانیانو لپاره نوې جوړه شوې تفریحي سیمه پرانیسته. دا تفریحي سیمه د پاکستان پوځ او صوبايي حکومت په ګډه د سیلګرۍ د ودې او ځايي خلکو ته د کار روزګار پېدا کولو لپاره جوړه کړې ده.
د پاکستان راډیو د یکشنبې ورځې د خبر له مخې؛ د کوهاټ له کلایه دوه نیم ساعته لرې د اورکزۍ ولسوالۍ «دا سیمه د جنت په څېر ده».
په دغه نوې تفریحي سیمه کې د کورنیو او بهرنیو سیلانیانو لپاره د صوبې د نورو پارکونو په څېر اسانتیاوې برابرې شوې دي.
اوکرزۍ ولسوالۍ په ټوله کې طبیعي منظرې لري او د سیمې خلکو هم دې ولسوالۍ ته د خلکو د جذبولو لپاره په خواله رسنیو کې له دوو کلونو راهیسې کمپاین پیل کړی دی.
له دې کمپاین سره دې سیمې ته د پښتونخوا له مختلفو برخو خلک ور مات شوي؛ خو دې وروستیو کې بیا اورکزیو کې د وسلوالو له پېدا کېدو سره وېره پېدا شوې، چې تازه غوړېدلې سیلګرۍ ته به هم تاوان ورسېږي.
