د پاکستان امنیتي سرچینو تایید کړې، چې د خېبرپښتونخوا په تیرا کې یوه ځانمرګي بریدګر د چاودېدونکو توکو یو موټر ته د پاکستاني سرحدي سرتېرو د تالاشۍ له پوستې سره چاودنه ورکړې، چې له امله یې یو سرتېری وژل شوی او درې نور ټپیان دي.
په خېبر پښتونخوا کې ځایي خبریال رحمان ګل یوسفزي افغانستان انټرنشنل- پښتو ته وویل، چې ځايي چارواکو ورته تایید کړې ده، چې نن سهار یوه ځانمرګي بریدګر خپل موټر ته د ایف سي یا ملېشه سرتېرو د تالاشۍ له پوستې سره چاودنه ورکړې ده.
نوموړي وویل، چې په ټپیانو کې د دوو روغتیايي حالت نازک دی او د درملنې لپاره پېښور ته انتقال شوي دي.
بل خوا ای ار وای تلویزوني شبکې ویلي، چې په دغه پېښه کې د دوو افسرانو په ګډون یو سرتېری ټپي شوی دی.
تر اوسه د دغې پېښې پړه په رسمي ډول کومې وسلوالې ډلې پر غاړه نه ده اخیستې، خو په ټیلګرام کې د پاکستاني طالبانو تحریک ته نږدې کانالونو ویلي، چې دغه برید د خالد ابوذر په نوم یوه ۱۹ کلن ځوان کړی دی.
په دې وروستیو کې په پاکستان او په ځانګړي ډول خېبرپښتونخوا کې د امنیتي پېښو په شمېر کې زیاتوالی راغلی، چې له امله یې په قبایلي سیمو کې یو شمېر قومي جرګه ګۍ هم جوړې شوې دي.
په کابل کې د پاکستان سفارت وايي، د روان میلادي کال له پیله تر اوسه څه باندې ۱۱۶ زره افغانانو د پاکستان ویزې ترلاسه کړې دي. د دغه سفارت د شمېرو له مخې، سږ کال په افغانستان کې د پاکستان سفارت او څلور کونسلګرۍ هره ورځ په اوسط ډول ۵۵۰ کسانو ته ویزې ورکوي.
د پاکستان سفارت د شمېرو له مخې، دغه هېواد تېر کال شاوخوا دونه نیم لکه افغانانو ته او په ۲۰۲۱میلادي کال کې شاوخوا څلور لکه لس زره افغانانو ته ویزې ورکړې دي.
د اعلان شویو شمېرو له مخې، په تېرو درېیو کلونو کې په افغانستان کې د پاکستان سفارت ټولټال ۷ لکه ۷۶ زره افغانانو ته ویزې ورکړې دي.
د رسمي شمېرو له مخې یوازې د پاکستان په خیبر پښتونخوا کې شاوخوا ۹۵۷ زره افغان کډوال ژوند کوي، چې له دې ډلې تر ۶۵۰ زرو لږ یې د کډوالو لپاره د ملګرو ملتونو د عالي کمېشنرۍ په دفتر کې ثبت دي.
د خیبر پښتونخوا ایالتي حکومت ویلي، چې ۵۹۷ جعلي شناختي کارډونه یې باطل کړي دي. همدارنګه د دغو شمېرو پر بنسټ، درې زره او ۹۱۱ افغان کډوال د بېلابېلو جرمونو په تور نیول شوي دي.
د پاکستان د حکومت د شمېرو له مخې، په پاکستان کې شاوخوا ۱.۷ میلیونه نا ثبت شوي افغان کډوال ژوند کوي.
په داسې حال کې چې دغه هېواد له تېرو څلورو لسيزو راهيسې د ميليونونو افغان کډوالو کوربه دى، تېره مياشت د دغه هېواد حکومت ناقانونه کډوالو ته یوه میاشت وخت ورکړی چې له یاد هېواده ووځي. خو د نه وتلو په صورت کې به ونیول شي او وبه اېستل شي.
همداراز،د راپورونو له مخې، د پاکستان حکومت د افغان ناقانونه مهاجرینو موضوع ته د رسیدګۍ لپاره، د افغان کډوالو د نیولو بهیر ډېر کړی دی.
په پېښور کې د طالبانو د ادارې جنرال کونسل قاري محب الله شاکر وايي، چې د پاکستان د وروستیو ناامنیو په غبرګون طالبانو یوه فتوا صادره کړې، چې له مخې یې په پاکستان کې بریدونه حرام ګڼلي او دا عمل یې جهاد نه دی بللی. هغه زیاته کړې، چې د کډوالو د اېستلو په تړاو کوم اعتراض نه لري.
نوموړي له جیو نیوز سره په مرکه کې ویلي، چې د ټي ټي پي یو شمېر غړي د پخواني ولسمشر اشرف غني د واکمنۍ پر مهال افغانستان ته تللي وو او هلته ځای پر ځای شوي وو.
له دې وړاندې د طالبانو د دفاع وزیر ملا یعقوب هم ورته څرګندونې کړې وې او په پاکستان کې روانه ناامني او بریدونه یې له جهاد سره په ټکر کې بللي وو.
ورپسې یو شمېر پاکستاني رسنیو د سرچینو په حواله خبرونه خپاره کړل، چې پاکستان او طالبان یوې نتیجې ته رسېدلي، چې له مخې به یې د طالبانو مشر ملا هبت الله اخوند د یوې فتوا په صادرولو سره په پاکستان کې د ټي ټي پي روان جنګ ناروا ثابتوي.
په پېښور کې د طالبانو سرکونسل زیاته کړې، چې دوی غواړي په روښانه ټکو وښيي، چې په پاکستان کې به د افغانستان له لوري هېڅ ډول مداخله نه کیږي او د افغانستان خاوره به د دوی پر ضد نه کارېږي.
محب الله شاکر په پاکستان کې د افغان کډوالو وروستي کړکېچ ته په اشارې سره ویلي، چې دوی د پاکستان د پرېکړې په اړه هېڅ ډول اعتراض نه لري خو هیله لري، چې د افغان کډوالو د بېرته ستنولو لپاره پر یوه مناسبه کړنلاره غور وشي.
هغه وویل، چې غوره به وي، چې کډوالو ته د بېرته ستندو لپار وخت ورکړل شي.
شاکر پر افغان کډوالو غږ کړی، چې که څه هم د ستېندلو لومړنی پړاو به سخت وي، خو په افغانستان کې د کار او ژوند زمینه ورته برابره ده.
نوموړی دا خبرې په داسې مهال کوي، چې تېره اونۍ هم د افغانستان لپاره د ملګرو ملتونو د بشري مرستو د همغږۍ ادارې خبرداری ورکړی و، چې که له افغانستان سره بشري مرستې ونه شي راتلونکی ژمی به بحراني او سخت وي.
د پاکستان د کورنیو چارو وزارت سرپرست وایي، د بې قانونه کډوالو د اېستلو پرېکړه یوازې د افغانانو لپاره نه، بلکې په دغه هېواد کې د ایران د بلوڅانو لپاره هم ده. سرفراز بګټي زیاتوي، څوک چې د کډوالۍ کارت یا ویزه لري، د پاکستان مېلمه ده، خو بې قانونه کډوال که د هر هېواد وي اېستل کېږي.
سرفراز بګټي د چارشنبې په ورځ یوه غونډه کې وویل، بې قانونه کډوالو ته د ور کړل شوې نېټې داسې اخیستون کېږي چې دا پرېکړه یوازې د افغانانو په هکله ده، خو داسې نه ده، د ټولو بې قانونه کډوالو لپاره ده.
د پاکستان کورنیو چارو وزارت د روانې میاشتې لومړیو کې د اکتوبر تر وروستۍ نېټې بې قانونه کډوالو ته د وتلو لپاره وخت ور کړ.
پاکستان وايي، په دغه هېواد کې ۴.۴ میلیونه قانوني او ۱.۷ میلیونه بې قانونه افغان کډوال اېستل کېږي.
له دې نېټې راهیسې په پاکستان کې له افغان کډوالو سره د امنیتي ادارو چلن لا سخت شوی دی.
د پاکستان پر کورنیو ادارو سربېره نړیوالې ادارې هم له اسلام اباد غواړي چې دا پرېکړه واخلي، خو پاکستان وايي، له دې پرکړې نه شاته کېږي.
پرلت کوونکي وايي، که تر راتلوونکو دوو ورځو د پاکستان حکومت خپله پرېکړه بدله نه کړي په لویو لاریونونو به لاس پورې کړي. په سویلي پښتونخوا چمن کې زرګونه کسانو د ډیورنډ فرضي کرښې ته څېرمه د پاکستان د یوې پوځې اډې مخې ته پرلت وهلی دی.
دغه پرلت وهوونکي د پاکستان له حکومته غوښتنه کوي چې خپله هغه پرېکړه بېرته واخلې چې پر سپین بولدک ـ چمن دروازه تګ راتګ به په پاسپورټ او ویزه تر سره کیږي.
د چمن اوسیدونکی او قومي مشر عبدالحلیم پهلوان، پرلت ته د وینا پر مهال وویل:«موږ ازاد قبایل له پیړیو، پیړیو راهیسې پر دغه سیمه اباد یو. انګریزانو زموږ په منځ کې کرښه وکښله خو دا په دې مانا نه ده چې موږ دې پر دې سیمه د هر واکمن پرېکړه ومنو. موږ د چمن اوسیدونکي په هیڅ صورت د پاکستان دا پرېکړه نه منو چې پر دروازه باندې په پاسپورټ او ویزه تګ راتګ وکړو.»
د لغړي اتحاد مسولان وايي، له تېرو دوو کلو راهیسې د پاکستان له لورې دا هڅې روانې چې تګ راتګ په پاسپورت او ویزه وشي.
«پاکستان د سپین بولدک ـ چمن پر دوازه لومړی د مساپرو تګ راتګ کې ستونزې پیدا کړې چې مساپر په دغه دروازه تګ راتګ و نه کړي.»
همدارنګه وروسته د پاکستان حکومت په چمن او سپین بولدک کې مېشت سوداګرو پر کاروبار باندې، «په ځېنو بندیزونو لګولو سره هڅه وکړه چې دلته د زرګونو کسانو کاروبار بند شي.»
د چمن د لغړي اتحاد مشر غوث الله وايي «که تر راتلونکو دوو ورځو مو د پاکستان حکومت له لورې غوښتنې و نه منل شي په چمن کې به په لویو لاریونونو لاس پورې کړو.»
نوموړی وايي:« که د جمعې تر شپې زموږ غوښتنې و نه منل شي موږ دلته په چمن کې ټول دولتي ادارو او پوځي ادارو دفترونه تړو او ښايي له تاوتریخوالي ډک لاریون وکړو.»
تر دې مهاله د پاکستان حکومت د یادو پرلت کوونکو د غوښتنو په اړه څه نه دي ویلي.
د کرېکټ نړۍ مشهورو ستورو، د لویو لوبډلو روزونکو او سیاستوالو د پاکستان په وړاندې د افغانستان د تاریخي بري په اړه تبصرې کړې، چې دې کار د پاکستان خپګان نور هم زیات کړی دی. پاکستان ته په ماتې ورکولو سره افغان لوبډلې په خپل لوبیز تاریخ کې په نړیوال جام کې خپل دویم بری ثبت کړ.
د چینای په چیدمبرام لوبغالي کې د افغانستان او پاکستان تر منځ د لوبې له پیله د کرېکټ مبصرینو ویلي وو، چې د لوبغالي ویشتنځای د ورو توپ اچونکو لپاره جوړ دی.
افغانستان د پاکستان په وړاندې د لوبې لپاره په لوبډله کې تیز توپ اچونکی فضل الحق فاروقي کښیناوه او پر ځای یې ورو توپ اچونکی نور احمد په لوبډله کې ور زیات کړ. چې په دې سره په افغان لوبډله کې څلورو ورو توپ اچونکو د پاکستان پر وړاندې توپ اچونه کوله.
نور احمد د خپلې جادویي توپ اچوونې پر مټ د پاکستان پیلیز توپ وهونکی عبدالله شفیق، په نړیوال جام کې تر ټولو ډیر منډه جوړونکی لوبغاړی محمد رضوان او د پاکستان لوبډلې لوبډلمشر بابر اعظم له میدانه بهر کړل.
په توپ وهنه کې رحمان الله ګربز او ابراهیم ځدران اوږده ملګرتیا وکړه، او ورپسې رحمت شاه زرمتي او افغان لوبډلمشر حشمت الله شاهدي لوبه په بري پای ته و رسوله.
په دغه تاریخې بري سره افغان لوبډلې په یو ورځینو لوبو کې د پاکستان څخه د ماتې خوړلو لړۍ پای ته ورسوله او پاکستانۍ لوبډله یې ماته کړه.
د افغانستان د لوبډلې تکړه توپ وهونکی رحمان الله ګربز د لوبې تر ګټلو وروسته وویل شپږ، اوه کاله موږ همدې ورځې ته انتظار ویوست، چې پاکستان لوبډله باید ماته کړو.
د پاکستان پر وړاندې د افغان ملي لوبډلې په اړه تبصرې او غبرګونونه.
هندي کرېکټر عرفان پټان په لوبغالي کې دا بری له راشد خان سره په نڅا او ګډا ونمانځله.
د کرېکټ د نړۍ افسانوي ستوري سچن ټنډولکر پر خپله ټویټر پاڼه لیکلي « په دې نړیوال جام کې د افغانستان د لوبډلې کارکردګي په زړه پوري وه. د توپ اچونې د پیاوړې کرښې په لرلو سره د انګلستان او پاکستان په څېر لوبډلو پر وړاندې بری د افغانستان د نوې لوبډلې د راڅرګندېدو ښکارندویي کوي.»
د هند ملي لوبډلې بل پخواني لوبغاړي، مشر روزونکي او د کرېکټ مشهور مبصر راوي شاستري افغان لوبډلې ته په خطاب کې پر ایکس پاڼه لیکلي، «تاسې د دوو نړیوالو اتلانو، اوسني او مخکني په ماتولو سره وښوده، چې واقعا زړور یاست. تاسې په دې ستر سټيج نړۍ ته خپله وړتیا وښودله.»
همدارنګه د هند لوبډلې پخواني توپ وهونکي سوریش راینا پر خپله ایکس پاڼه لیکلي، «د افغانستان لوبډلې، د پاکستان پر وړاندې د نن ورځې په زړه پورې بری مو مبارک شه ستاسو په زړه پورې ټیم، تکړه کپتانۍ، او ښه توپ وهنه د لېدو لپاره په زړه پورې وه. ځلانده اوسئ.»
خو تر دغه خوږ بري وروسته په پاکستانې رسنیو کې خپګان راڅرګند شو.
د پاکستان د لوبډلې پر کپتان سختې نیوکې وشوې. د کرېکټ پاکستانيو مبصرینو بابر اعظم یو ناکاره کپتان یاد کړ او وايي د پاکستان لوبډلې د افغانستان پر وړاندې با مسولیته لوبه تر سره نه کړه.
د پاکستان د کرېکټ پخواني افسانوي تېز توپ اچونکي پر خپل یوټیوب چینل یوه تبصره خپره کړې ده او داسې یې ویلي، «افغانان زموږ وروڼه دي خو نن موږ د خپلو ورونو له لوري وډبول شوو.»
د پاکستان لوبډلې پخوانی لوبډلمشر وسیم اکرم. د پاکستان لوبډلې د تیرې شپې لوبې په اړه د پاکستان پر کریکټ بورډ سختې نیوکې وکړې. او د افغان لوبډلې په اړه وايي، «افغان لوبډلې مبارک مو شه! ښه لوبه مو وکړه. په توپ اچونه، توپ وهنه او ډګر ساتنه کې مو د پاکستان لوبډلې ته ماته ورکړه په زړه پوري لوبه مو وکړله.»
د پاکستان لوبډلې پخوانی کپتان مصباح الحق د لوبې پر مهال د افغان لوبډلې د ورو توپ اچونکو ستاینه کوي وايي، «په نړۍ کې تر ټولو قوي ورو توپ اچونکي د افغانستان د لوبډلې سره دي او نن شپه یې وښوده چې د نړۍ قوي لوبډلو ته ماتې ورکولای شي.»
همدارنګه د پاکستان لوبډلې اوسنۍ لوبډلمشر بابر اعظم له افغان لوبدلې څخه د ماتې خوړلو وروسته د یوه رسنیز کنفرانس پر مهال افغان لوبډلې ته د لوبې ګټلو مبارکي ورکړه. خو د خپلې لوبډلې د کارکردګۍ څخه ډیر ناخوښه و.
