له کندهاره ځایي سرچینې وايي، پاکستان د سپین بولدک ـ چمن پر دروازه هغو مساپرو ته د تګ راتګ اجازه نه ورکوي چې ویزه او پاسپورټ نه لري. وړاندې تر دې پر دغه دروازه کندهار او سوېلي پښتونخوا ته تګ راتګ د افغاني تذکرې او د پاکستان په شناختي کارډ تر سره کېده.
د کندهار سپین بولدک څخه سرچینې افغانستان انټرنشنل پښتو ته وايي، د چهار شنبې په ورځ د (لړم ۱۰مه) د پاکستان له لورې د سپین بولدک ـ چمن دروازه د هغو مساپرو له پاره وتړل شوه چې پاسپورټ او ویزې نه لري.
دغه سرچینه وايي، له تیرو څو میاشتو راهیسې د پاکستان له لورې د سپین بولدک ـ چمن پر دروازه په پاسپورټ د تګ راتګ د حتمي کیدو هڅې روانې وې، خو نن د دغه هیواد له لورې په بشپړه توګه دغه دروازه د پاسپورټ نه درلودونکو کسانو له پاره وتړل شوه.
پاکستان د پاسپورټ نه درلودونکو کسانو پر مخ دغه دروازه پر داسې مهال تړلې چې ګڼ افغان کډوال له پاکستانه په زور افغانستان ته استول کیږي.
بل خوا زرګونو کسانو له تېرو ۱۱ ورځو راهیسې د سوېلي پښتونخوا په چمن ښار کې د پاکستان له لوري پر سپین بولدک ـ چمن دروازه په پاسپورټ د تګ راتګ د حتمي کېدو په غبرګون پرلت وهلی دی. خو تر دې مهاله د پاکستان حکومت د پرلت وهونکو غوښتنو ته مثبت ځواب نه دی ویلی.
د پاکستان له لورې د پاسپورټ نه درلودونکو کسانو پر مخ د سپین بولدک ـ چمن دروازې بندېدو په تړاو تر دې مهاله طالبانو کوم غبرګون نه دی ښودلی.
