طالبان: د جاپان سفیر د لوړو زدهکړو د وزیر له هڅو ستاینه کړې
طالبان وايي، د جاپان سفیر د دغې ډلې د لوړو زدهکړو وزیر د هغه د ښو چارو په ترسره کولو او د زدهکړو د سیسټم د پیاوړي کولو له امله ستایلی دی.
طالبان وايي، د جاپان سفیر د دغې ډلې د لوړو زدهکړو وزیر د هغه د ښو چارو په ترسره کولو او د زدهکړو د سیسټم د پیاوړي کولو له امله ستایلی دی.
د طالبانو لوړو زدهکړو وزارت په خبرپاڼه کې راغلي، چې د جاپان سفیر تاکویوشي کورمایا د طالبانو د لوړو زدهکړو له وزیر سره کتلي او د لوړو زدهکړو په پیاوړتیا او پرمختګ کې یې د هغه کارونه ستایلي او ډاډ یې ورکړی، چې هېواد یې د افغانستان او نړۍوالو تر منځ د ښه تعامل د رامنځ ته کولو په هڅه کې دی.په خبر پاڼه کې راغلي، جاپاني سفیر ندا محمد ندیم ته ډاد ورکړی چې هېواد به یې په افغانستان کې د ډاکټر ناکامورا نېمګړې پروژې بشپړې کړي او د دغه هېواد د تحصیلي نظام په پرمختګ کې به ورسره مرسته او همکاری وکړي.خو د طالبانو د لوړو زدهکړو وزارت په خبرپاڼه کې د دې یادونه نه ده شوې، چې جاپاني سفیر د ندا محمد ندیم کومې هڅې ستایلې دي.ندا محمد ندیم د طالبانو په ډله کې هغه کس یادېږي، چې د نجونو له زدهکړو او مېرمنو د کار سره بې درېغه مخالفت کوي او له همدې امله ځینو هېوادونو هغه د بندیزونو په نوملړ کې هم شامل کړی دی.
