په سوېلي پښتونخوا کې پرلت وهونکي د تیرو ۱۱ ورځو راهیسې د سپین بولدک - چمن پر دروازه د پاسپورټ او وېزې نه منلو په غبرګون کې پرلت وهلی، خو تر دې مهاله یې د پاکستان د حکومت له لورې غوښتنې نه دي منل شوې.
پر ډیورنډ کرښه پروت د سوېلي پښتونخوا په چمن ښار کې زرګونو سوداګرو، ځایي سیاسي ګوندونو او د چمن ښار اوسیدونکو له تېرو یوولس ورځو راهیسې په چمن کې د پاکستان د یوې پوځي اډې مخې ته د پاکستان د هغې پرېکړې په غبرګون پرلت وهلی چې د سپین بولدک ـ چمن پر دروازه دېاو و تګ راتګ په پاسپورټ او ویزې تر سره شي.دغه پرلت وهونکي وايي، د پاکستان د حکومت دغه پریکړه په هیڅ ډول هغوی ته د منلو نه ده.پرلت وهونکي وايي، که پر سپین بولدک ـ چمن په دروازه په پاسپورټ تګ راتګ ومني د دې مانا دا ده چې د ډیورنډ کرښه یې ومنله.د بشري حقونو ملاتړی او مدني فعال حمیدالله وايي: «موږ پر دې دروازه پاسپورټ نه منو او نه هم چاته د پاسپورټ اجازه ورکوو، که زموږ افغانیت ژوندی وي، که مو پښتونولي ژوندۍ وي، د دې دروازي په خاطر ژوندۍ ده. که موږ په پاسپورټ پر دې دروازه تګ راتګ وکړو بیا نو ځانته افغانان نه شو ویلای او نور به موږ جلا شو.»دغه پرلت کوونکي وايي، طالبان هم باید د پاسپورټ د عملي کولو په برخه کې چوپ پاتې نه شي، او که طالبانو ته هم په پاسپورټ تګ راتګ د منلو وي موږ طالبانو ته هم د خپلو قبایلي اصولو له لارې دا اجازه نه ورکوو.تېره شپه د چمن د ځایې امنیتي کسانو له لورې هڅه شوي وه چې د پرلت د پای ته رسولو له پاره له زوره کار واخلي، خو د زرګونو پرلت وهونکو له لورې یې مخه ونیول شوه.د چمن د لغړې اتحاد مشر غوث الله وايي: «موږ په زرګونه کسان دلته د شپې او ورځې د پرلت په موخه ناست یو، هیڅوک دا توان نه لري چې زموږ د غوښتنو منلو پرته پرلت پای ته ورسوي. موږ د پاکستان د حکومت د هرې ناروا کړنې په وړاندې هر ډول قربانۍ ته چمتو یو.»ویل کیږي چې په نېږدې ورځو کې د پاکستان سرپرست لومړی وزیر انوار الحق کاکړ چمن ته د پاسپورټ د ورکړي د لړۍ د افتتاح په موخه سفر کوي.
