د کرېکټ نړۍوال جام؛ بنګله دېش سریلانکا ته په درېیو ویکټو ماتې ورکړه
د کرېکټ د نړۍوال پنځوس اوریز جام په سیالیو کې نن بنګله دېش د سریلانکا لوبډلې ته د درېیو ویکټو په توپیر سره ماتې ورکړه.
د کرېکټ د نړۍوال پنځوس اوریز جام په سیالیو کې نن بنګله دېش د سریلانکا لوبډلې ته د درېیو ویکټو په توپیر سره ماتې ورکړه.
د توپ وهنې په لومړۍ پاڼۍ کې سریلانکا د بنګله دېش لوبډلې ته ۲۸۰ منډې هدف وټاکه او د بنګله دېش د توپوهنې په پاڼۍ کې یادې لوبډلې د اوو لوبغاړو په سوځېدو سره په ۴۲ اورونو کې یاد هدف پوره کړ.
ټاکل شوې، چې د نړۍوال جام د سیالیو په ترڅ کې سبا افغانستان له اسټرالیا سره په لوبه کې مخامخ شي.
افغانستان تر دې دمه څلور لوبې ګټلي او په درېیو کې یې ماتې خوړلې ده.
افغانستان انټرنشنل-پښتو د طالبانو د بهرنیو چارو وزارت هغه مکتوب تر لاسه کړی، چې له مخې یې دغې ډلې د تاجکستان لپاره یو ډېپلوماټ د لومړي سکرتر په توګه ګومارلی دی.
په مکتوب کې په تاجکستان کې د افغانستان سفارت ته لیکل شوي، چې فیض الله د دغه سفارت د اول سکرتر په توګه ګومارل شوی او د دندې د اشغال په برخه کې دې ورسره همکاري وکړي.
یاد مکتوب د روانې لړم میاشتې په یولسمه نېټه په تاجکستان کې د افغانستان سفارت ته لېږل شوی دی.
د طالبانو د بهرنیو چارو وزارت یوې سرچینې افغانستان انټرنشنل-پښتو ته تایید کړه، چې د تاجکستان لپاره یې یو ډېپلوماټ په دنده ګومارلی دی.
تر اوسه د دغه مکتوب په اړه په تاجکستان کې د افغانستان سفارت څه نه دي ویلي.
دا مهال په تاجکستان کې د افغانستان سفارت د پخواني جمهوري دولت د ډېپلوماټانو له خوا اداره کیږي او سفیر یې ظاهر اغبر دی.
تر اوسه پورې د تاجکستان د بهرنیو چارو وزارت د طالبانو د نوي ډېپلوماټ په اړه څه نه دي ویلي.
تر دې وړاندې طالبانو ته په متحده عربي اماراتو کې د افغانستان سفارت وسپارل شو او دغې ډلې خپل یو ډېپلوماټ د دغه سفارت د چارسمبالي په توګه وګوماره.
د طالبانو د رییس الوزرا اقتصادي مرستیال د ایران د کورنیو چارو له وزیر څخه وغوښتل؛ هغه افغان بندیان چې په کوچنیو جرمونو تورن یا محکوم دي دوی ته وسپاري.
ملا عبدالغني برادر احمد وحيدي ته وويل، چې دغه بنديان بايد د خپل بند پاتې موده د افغانستان په زندانونو کې تېره کړي.
د ایران د اسلامي جمهوریت د بهرنیو چارو د وزارت د جنرال قونسلګرۍ د شمېرو پر بنسټ څه باندې شپږ زره افغانان په ایران کې بندیان دي.
د طالبانو اقتصادي پلاوي چې د شنبې په ورځ (لړم۱۳مه) ایران ته سفر کړی، د ایران د کورنیو چارو له وزیر سره په لیدنه کې د "سوداګریزو، سیاسي، ټرانسپورټي، روغتیايي خدمتونو، ګرځندوی او کرنیزو اړیکو پر پراختیا" خبرې کړې دي.
د دوشنبې په ورځ (لړم ۱۵مه) د طالبانو تر کنټرول لاندې د ارګ پر اېکس پاڼې یو یادښت کې راغلي، چې ښاغلي وحیدي ویلي؛ ایران د افغانستان د صادراتو د زیاتوالي او د افغاني محصولاتو د ټرانزیت په برخه کې لومړیتوب لري.
د ایران د کورنیو چارو وزیر دغه هېواد د افغاني محصولاتو لپاره نېږدې او ښه بازار وباله او زیاته یې کړه، چې افغان لوری باید خپل تولیدات ایران ته صادر کړي څو په ایران کې وپلورل شي.
څه موده وړاندې د طالبانو د صنایعو او سوداګرۍ وزارت ویلي وو، چې د ایران او افغانستان ترمنځ د سوداګریزو توکو د راکړې ورکړې اندازه په کال کې دوه میلیارد ډالرو ته رسېږي.
دغه وزارت وايي؛ هڅه کوي چې دا اندازه په کال کې لس میلیارده ډالرو ته لوړه کړي.
د دې ترڅنګ د ایران د کورنیو چارو وزیر یو ځل بیا د افغانستان له لارې د ایران او چین پر اړیکو ټینګار کړی دی.
یو شمېر سرچینو رویټرز ته ویلي؛ د روسیې ولسمشر ولادیمیر پوتین پرېکړه کړې، چې د ۲۰۲۴ کال په ولسمشریزو ټاکنو کې برخه واخلي او تر ۲۰۳۰ پورې په واک کې پاتې شي. د سرچینو په وینا؛ پوتین په دې باور دی چې هغه باید د دې هیواد په عصري تاریخ کې تر ټولو په خطرناکه دوره کې روسیه رهبري کړي.
دغې سرچینې چې نه یې غوښتل نوم یې واخیستل شي د موضوع د حساسیت له امله رویټرز خبري اژانس ته ویلي چې د ښاغلي پوتین سلاکاران اوس انتخاباتي کمپاین ته تیاری نیسي.
یوې بهرنۍ ډېپلوماتیکې سرچینې چې د نوم د نه ښودلو په شرط یې خبرې کولې وویل؛ ښاغلي پوتین دا پرېکړه په دې وروستیو کې کړې او ډېر ژر به اعلان شي.
د رویټرز په وینا؛ نظر پوښتنې ښیي چې پوتین په روسیه کې د 80 سلنې د تایید درجه لري او دا چې هغه ډاډه دی چې هغه به د حکومت په ملاتړ، دولتي رسنیو او د عامه اپوزیسیون په ملاتړ کمپاین ته ننوځي.
د کرملین ویاند دیمیتري پیسکوف په سپټمبر کې وویل، چې که پوتین د ټاکنو پرېکړه وکړي نو هیڅوک نه شي کولی د هغه پر وړاندې ودریږي.
پوتین چې د ۱۹۹۹ کال په وروستیو ورځو کې یې د روسیې له پخواني ولسمشر بوریس یلتسین څخه واک واخیست، له جوزف سټالین راهیسې تر بل هر واکمن په روسیه کې زیات واکمن دی، حتا د لیونید برژنیف ۱۸ کلن ریکارډ یې مات کړ.
پوتین د روان کال د اکټوبر په اوومه (د تلې ۱۵ مه) ۷۱ کلن شو.
د اوکراین جګړه
په داسې حال کې چې پوتین ممکن په ټاکنو کې له جدي ننګونې سره مخ نه شي، د روسي استخباراتي اداری پخوانی جاسوس د اوکراین د جګړې په ګډون له خورا جدي ننګونو سره مخ دی.
په اوکراین کې جګړه په ۱۹۶۲ کال کې د کیوبا د میزایلو له کړکېچ وروسته له لویدیځ سره د روسیې تر ټولو لویه مقابله ده.
سربیره پردې؛ د لویدیځ بندیزونه په وروستیو لسیزو کې د روسیې اقتصاد ته ترټولو لوی زیان رسولی دی. د یوګیني پرېګوژین ناکام بغاوت د پوتین لپاره بله جدي ننګونه وه.
د اپوزیسیون زنداني سیاستوال الیکسي ناوالني ویلي دي، چې پوتین د یو ستراتیژیک کړکېچ پر لور د روسیې د تباهۍ لامل شوی او یو نازک سیستم یې رامنځته کړی چې بالاخره به د ثبات پر ځای ګډوډي راولي.
اولیګ اورلوف د روسیې د بشري حقونو له فعالینو څخه دی، د جولای په میاشت کې رویټرز ته وویل: "روسیه په شا کیږي.موږ کمونیستي توکمپالنه پرېښوده، مګر اوس موږ په بل ډول مطلقیت کې نیول شوي یو".
د رویټرز په وینا؛ د اوکراین له جګړې راهیسې څو سوه زره روسي او اوکرایني پوځیان وژل شوي یا ټپیان شوي دي، چې دا د افغانستان په لس کلنه جګړه کې له ۱۹۷۹ څخه تر ۱۹۸۹ کلونو پورې د پخواني شوروي اتحاد د پوځ له تلفاتو ډېر دي.
ملګري ملتونه وايي، د طالبانو له خوا د کوکنارو د کښت د بندولو حکم د دې لامل شوی، چې کروندګرو د تریاکو له خرڅلاو څخه تر یو میلیارد ډالرو زیات عاید له لاسه ورکړي.
د دغه سازمان له نشه يي توکو او جرمونو سره د مبارزې دفتر وايي، چې د دغه فرمان له صادرېدو وروسته د کوکنارو په کښت کې ۹۵ سلنه کموالی راغلی دی.
کله چې د ۱۴۰۰ په اوړي کې طالبانو پر کابل واک ترلاسه کړ، افغانستان په نړۍ کې د تریاکو لوی صادرونکی او په اروپا او اسیا کې د هیروینو اصلي سرچینه وه.
طالبانو د ۱۴۰۱ کال حمل په میاشت کې د مخدره موادو پر کښت او تولید بندیز اعلان کړ. د طالبانو دغه اقدام په سلګونو زره بزګرانو او د ورځ مزدو کارګرانو ته سخته ضربه ورکړه، چې د خپل ژوند د دوام لپاره یې د دې فصل په عایداتو تکیه کوله.
ملګرو ملتونو اوس په افغانستان کې د کوکنارو د کښت کموالی تایید کړی، کلیوالو ته د لا زیاتو مرستو او په دغه هېواد کې د کوکنارو پرته د راتلونکي لپاره د بدیل کښت پر بېړنۍ اړتیا ټینګار کوي.
د نشه يي توکو او جرمونو په برخه کې د ملګرو ملتونو د دفتر اجرايوي مشرې غاده ولي په افغانستان کې د اپينو د توليد د کمښت هرکلى وکړ.
په ورته وخت کې هغه وویل، چې دا کمښت مهمې پایلې او خطرونه لري چې باید په پام کې ونیول شي.
مېرمن ولي ټینګار وکړ، چې نن ورځ د افغانستان خلک د خپلو اړتیاو د پوره کولو لپاره د ضایع شوي عاید پر ځای عاجلو بشري مرستو ته اړتیا لري.
ملګري ملتونه وايي؛ که څه هم د غنمو کرل په افغانستان کې د خوراکي توکو ناامني تر یوه حده راکمولای شي؛ خو د کوکنارو په پرتله د غنمو حاصل ډېر کم دی.
د اروپايي ټولنې د بهرني سیاست یوه چارواکي په منځني ختیځ کې وضعیت په تړاو د اسراییل او فلسطین د ستونزې د حل لپاره د ریښتینې لېوالتیا د نشتوالي له امله "د ټولیزې سیاسي او اخلاقي ناکامۍ پایله" وبلله.
جوزپ بورل ټینګار وکړ، چې د یهودو ضد او د مسلمانانو ضد احساسات په بشپړه توګه د منلو وړ نه دي.
رویټرز مخکې راپور ورکړی و، چې په غزه کې د جګړې له پیل راهیسې په یو شمېر هیوادونو کې د یهودانو ضد کرکه زیاته شوې ده.
د راپورونو له مخې؛ په تېرو اونیو کې د امریکا، برېتانیا، فرانسې او جرمني په هېوادونو کې د صهیونیزم ضد څپې ډېرې شوې دي.
په تېرو څلورو اونیو کې په یو شمیر هېوادونو کې د یهودیت ضد څپې په اړه رویټرز راپور ورکړ، چې په لاس انجلس کې یو سړي هڅه وکړه، چې د یهودي کورنۍ کور ته ننوځي په داسې حال کې چې "یهودان ووژنئ" چیغې یې وهلې.
دغه خبری اژانس د ارجنټاین په بیونس ایرس کې د یوې یهودی کورنۍ د والدینو له قوله خبر ورکړی، چې د یهودانو په یوه مشهور ښوونځی کې د هغوی له ماشومانو څخه غوښتل شوي، چې خپل دودیز کالي وانه غوندي ترڅو د پېژندل کېدو او له ځورونې څخه مخنیوي وشي.
د ګارډین په وینا؛ جوزپ بورل د دوشنبې په ورځ ( د لړم په ۱۵مه ) د اروپايي اتحادیې د سفیرانو په کلني کنفرانس کې وویل: "زه فکر کوم چې موږ اروپایان اخلاقي او سیاسي مکلفیت لرو، چې د حل لپاره مرسته وکړو".
د هغه په وینا؛ اروپا باید یو قوي او متوازن دریځ غوره کړي، څو په هر قیمت اروپا ته د شخړو د راوستلو مخه ونیول شي.
د اروپايي ټولنې د بهرنۍ تګلارې مشر د نړۍوالو بشردوستانه قوانینو پر درناوي ټینګار وکړ او ویې ویل چې په غزه کې بشردوستانه اوربند لومړی ګام دی.
