د خراسان رضوي د سرحدي ګارد قوماندان وايي، چې ایراني پوله ساتو په تایباد کې ۲۱۴۰۷ افغان کډوال نیولي، چې په غیر قانوني توګه ایران ته داخل شوي وو او بېرته یې افغانستان ته استولي دي. د روان کال په لومړیو شپږو میاشتو کې څه باندې ۳۲۸ زره افغان کډوال له ایرانه ایستل شوي دي.
د خراسان رضوي د سرحدي ساتونکو قومندان مجید شجاع د دوشنبې په ورځ (د لړم ۲۲مه) په یوې خبري غونډې کې وویل، چې دغه کډوال په تېرو ۹ ورځو کې ایران ته د دوی د "غیر قانوني" ننوتلو پر مهال وپېژندل شول او په دوغارون کې د طالبانو استازي ته وسپارل شول.
دا په داسې حال کې ده، چې له ایران څخه راستانه شویو افغانانو د فرانسې ۲۴ خبري شبکې ته ویلي، چې که څه هم له دوی څخه یې ځینو د استوګنې رسمي اسناد درلودل؛ خو نیول شوي او ایستل شوي دي.
د ایران اسلامي جمهوریت هم له دغه هېواد څخه د افغان کډوال د ایستلو په هکله د پاکستان د موقت حکومت له پریکړې سره سم د افغان مهاجرینو د ایستلو لړۍ تیزه کړې ده.
د ایران دولتي خبري اژانس ایرنا راپور ورکړی، چې د روان کال په لومړۍ نیمايي کې څه باندې ۳۲۸ زره افغان کډوال له ایرانه ایستل شوي دي.
دغه راز د لړم د مياشتې له لسمې نيټې څخه تر ٢٢٠ زرو زيات افغان مهاجرين له پاکستان څخه ايستل شوي دي.
پاکستاني رسنيو د دوشنبې په ورځ (د لړم په ٢٢مه) وويل، چې تر ٢٢٠ زره زيات افغان کډوال افغانستان ته راستانه شوي دي.
د پاکستاني چارواکو په وینا؛ یوازې د یکشنبې په ورځ ۳۴۳ کسان له ۳۱۲ موټرو سره افغانستان ته راستانه شول.
خو د طالبانو له خوا خپرې شوې احصایې له دغو احصایو سره توپیر لري.
د طالبانو د کډوالو چارو وزارت د یکشنبې په ورځ د تورخم او سپین بولدک له لارو د راستانه شویو کډوالو شمېر پنځه زره او ۵۷ تنه اعلان کړ.
پاکستان بیا خبر ورکړی، چې سر له نن څخه به د ډېورنډ پر پوله درې نورې لارې پرانیزي.
د کډوالۍ د ژوند د بدمرغۍ څو کوچنۍ نندارې.
