د اروپا د بهرنۍ پالیسۍ مشر جوزپ بورل د یکشنبې په ورځ د غزې په تړانګه کې د جګړې د "سملاسي درېدو" غوښتنه وکړه چې د روغتون ناروغان خوندي ځایونو ته ولیږدول شي. هغه پر اسراییل غږ وکړ چې پر غزې په خپلو بریدونو کې له "بشپړ زغم" څخه کار واخلي او د ولسي وګړو ژوند خوندي کړي.
بورل د یکشنبې په ورځ په خپله اېکسپاڼه لیکلي: «اوسنیو جګړو په غزه کې روغتونونه سخت زیانمن کړي او ولسي وګړو او روغتیایي کارکوونکو ته یې درنه مرګ ژوبله اړولې ده.»
سربېره پر دې، ښاغلي بورل په غزه کې د بشري ناورین د ژوریدو په اړه د اروپایي اتحادیې اندېښنه څرګنده کړه او بشري مرستو ته یې د غزې د خلکو په دوامداره، چټک او آزاد لاسرسي ټینګار وکړ.
د اروپايي ټولنې په اعلامیه کې د حماس له خوا له روغتونونو او ولسي وګړو څخه د انساني سپر په توګه کار اخیستل غندل شوي او ټینګار شوی چې ولسي وګړو ته باید د جګړې له سیمې د وتلو اجازه ورکړل شي.
تر دې مخکې حماس د اسراییل ورته تورونه رد کړي وو او له ملګرو ملتونو یې د خپلواکې پلټنې غوښتنه کړې وه.
د اسراییل هوايي بریدونو په پراخه کچه د امبولانس او روغتون په ګډون ولسي بنسټونه په نښه کړي دي.
اسراییلي چارواکي ادعا کوي چې حماس له روغتیایي مرکزونو او امبولانسونو څخه د پوځي موخو له پاره کار اخلي.
اروپايي ټولنې د روغتونونو، روغتیایي وسایلو او د روغتونونو دننه د ولسي وګړو د ساتنې له پاره د نړیوال بشردوستانه قانون پر پلي کېدو ټینګار کړی دی.
