د جلال اباد یو شمېر اوسېدونکو افغانستان انټرنشنل ـ پښتو ته وویل، چې طالبانو په دغه ښار کې په نشه يي توکو روږدي کسان شکنجه کوي او وروسته یې وژني. په جلال اباد ښار کې یوه کورنۍ وايي؛ تېره ورځ طالبانو د شهزاده په نوم یو ځوان له سختې شکنجې وروسته اوبو ته اچولی او وژلی دی.
د جلال اباد ښار د پنځمې ناحیې یو شمېر اوسېدونکو نن دوشنبه ( د لړم ۲۹ مه ) افغانستان انټرنشنل ـ پښتو ته وویل، چې په نشه یې توکو د روږدي ۲۸ کلن ځوان شهزاده مړی چې څو ورځې وړاندې د ګوردو روغتون ته څېرمه د کانال د اوبو په لویې ویالې کې موندل شوی و، چې تېره ورځ یې د جنازې مراسم ترسره شول.
د شهزاده خپلوان وايي، نوموړی تېره چهارشنبه له کوره وتلی و او تېره ورځ یې د ننګرهار په حوزوي روغتون کې جسد پیدا شو، دوي زیاتوي دغه ځوان په شیشه روږدی و.
هغه انځورونه چې افغانستان انټرنشنل ـ پښتو ته رسېدلي، د خپرولو نه دي خو په دغو انځورونو کې د ټپونو نښې ښکاري چې د شهزاده لاسونه او پښې پر پړو تړل شوي دي او بیا اوبه ته غورځول شوی دی.
په دغو انځورنو کې یو بل جسد هم لیدل کیږی، چې ویل کیږي دا هم په نشه یې توکو روږدی دی.
د ننګرهار په حوزوي روغتون کې د عدلي طب سرچینې وايي؛ د طالبانو په راتګ سره بې وارثه جسدونه د پخوا په پرتله زیات شوي دي، دوی زیاتوي په جسدونو کې هغه کسان شامل دي، چې په بېلابېلو نشه یې توکو روږدي وي او د پېدا کېدو پر وخت یې لاسونه او پښې پر پړو تړل شوي وي.
په ننګرهار کې د طالبانو ځايي چارواکو په دې تړاو څه نه دي ویلي؛ خو د دې ولایت یو شمېر اوسېدونکي وايي؛ طالبان تل هڅه کوي چې د ورته راپورونو د خپرېدو مخه ونیسي.
په دې اړه مو هڅه وکړه، چې د ننګرهار حوزوي روغتون څخه په وروستي یو کال کې د جسدونو د پېدا کېدو په تړاو رسمي شمېرې واخلو؛ خو ځايي سرچینو افغانستان انټرنشنل ـ پښتو ته وویل، چې طالبانو له ټولو ډاکترانو او د روغتون مسوولینو غوښتي چې رسنیو ته په دې تړاو له معلوماتو ورکولو څخه ډډه وکړي.
په جلال اباد ښار کې یو شمېر ځايي اوسیدونکي د طالبانو حوزو پورې اړوند وسلوال د نشه یي توکو روږدي کسانو په شکنجه او وژلو کې په لاس لرلو تورنوي.
که څه هم له دې وړاندې د کابل په شمول په ګڼو ولایتونو کې د طالبانو د ډلې له خوا د معتادینو د راغونډلو په اړه کمپاینونه ترسره شوي دي او دغو کسانو ته د درملي اسانتیاوې برابروې کړي.
د جلال اباد ښار یو شمیر ځايي اوسیدونکي له طالب مشرانو غواړي، چې په دغه ولایت کې دې پر نشه يي توکو روږدو کسانو د شکنجې او وژلو روان بهیر ودروي او ددې کار مخه دې ونیسي.
