د هلمند اوسېدونکي: طالبان مو پلرنۍ ځمکې راڅخه لاندې کوي
د هلمند مرکز لښکرګاه ښار او سنګین ترمنځ دوه لارې د سیمې اوسېدونکي وايي طالبان یې په زور له خپلو مېنو څخه شړي او د دوی خپلې پلرنۍ ځمکې د ټوپک په زور ترې لاندې کوي.
د هلمند مرکز لښکرګاه ښار او سنګین ترمنځ دوه لارې د سیمې اوسېدونکي وايي طالبان یې په زور له خپلو مېنو څخه شړي او د دوی خپلې پلرنۍ ځمکې د ټوپک په زور ترې لاندې کوي.
د دغې سیمې اوسېدونکي افغانستان انټرنشنل ـ پښتو ته وايي له تېرو دوه ورځو راهیسې د ځايي طالبانو او د سیمې د اوسیدونکو تر منځ اخ وډب رامنځته شوی طالبان هڅه کوي چې د سیمې له اوسېدونکو د دوی کرنیزې ځمکې لاندې او خپلې کړي.
هغه ویډیوګانې او انځورونه چې له سیمې څخه افغانستان انټرنشنل ـ پښتو ته استول شوي د سیمې اوسېدونکي شکایت کوي او وايي، طالبان یې له خپلو ۳۰ کلنو کرنیزو ځمکو او مېنو څخه په زور شړي.
د سیمې اوسېدونکي وايي: «کورونو ته مو راننوتل، زموږ څخه یې لمریزې هندارې یا شمسیانې، بیطرۍ او نور وسایل په زور یووړل. موږ چیرې ولاړ شو، هلته مو پاکستان نه پریږدي دلته مو طالبان نه پریږدي.»
د سیمې یوبل اوسیدونکی وايي: «له تېرو ۳۰ کلو راهیسې په دغه سیمه کې په کرکيله بوخت يو خو اوس طالبانو د کرنې له پاره اوبه راباندې بندې کړې.»
د سیمه ییزو طالبانو او سیمې د اوسېدونکو تر منځ تیره ورځ اخ و ډب هم شوی دی.
دا کسان وايي: «غږ مو نه اوریدل کیږي د طالبانو لوړ پوړي چارواکي د دوی د ظلم په اړه چوپ پاتې دي او طالبان غواړي په سیمه کې اباد کورونه، ونې او باغونه ویجاړ کړي.»
بل خوا سرچینې وايي، طالبان غواړي د کندهار هرات عمومي سړک ته څېرمه لښکرګاه ښار ته نږدې په دغه سیمه کې صنعتي پارک جوړ کړي.
