په لغمان کې طالب چارواکو بیت المقدس ته ورته جامع جومات پرون د دې ډلې د پخواني مشر اختر محمد منصور په نوم پراینست. د مهترلام ښاروالۍ وايي، د دې جومات ټول لګښت دې ادارې ورکړی، خو سرچینو افغانستان انټرنشنل- پښتو ته وویل، چې د جومات مصارف په جلال اباد کې د ایران کونسلګرۍ پرې کړي.
دا جومات د لغمان ولایت د قرغۍ ولسوالۍ په سورخکان کې د لس ميلیونه درې لکه پنځوس زره افغانیو په لګښت جوړ شوی دی، چې تر پنځوسوو کسان ځایوي.
د جومات د پرانیستې مراسمو کې پر ځايي طالب چارواکو سربېره د ایران کونسل مجید صادق دولت ابادي هم ګډون درلود.
طالب چارواکو ځايي رسنیو ته ویلي و چې د ایران د کونسل انځور یا ویډیو ونه کړي او نه یې هم نوم په راپورونو کې یاد کړي.
د ایران د تسنیم او ایسنا په څېر حکومت پلوه او حکومتي رسنیو هم د دې جومات خبر ته پراخ پوښښ ور کړی دی، خو د خپل کونسل د ګډون یادونه یې نه ده کړې.
د سرچينې د معلوماتو له مخې، د طالبانو له خوا بیت المقدس ته د ورته مسجدونو د جوړېدو هدف د بیت المقدس ازادول دي.
د جومات د پرانيستي پرمهال د طالبانو پر بيرغ سربېره د فلسطین بیرغ هم ځوړند و او د ازادۍ لپاره يې ګډه دعا هم وشوه.
که څه هم طالبانو د بیت المقدس د جګړې اړوند خپل دريځ نه دی روښان کړی خو يو شمېر طالبان وایي، چي د اسلام په نوم هر ډول قربانيو ته تيار دي.
د طالبانو د واکمنېدو سره سم لومړی دې ډلې اقصا جومات ته ورته يوه څلور لارې د کابل ښار په کمپنۍ ساحه کي پرانيسته.
