د تورخم دروازه د مسافرینو او بارو وړونکو لاریو پر مخ خلاصه شوه
د طالبانو د ننګرهار د امنیه قوماندانۍ چارواکي وايي، چې له پاکستاني لوري سره له خبرو وروسته د تورخم دروازه د باروړونکو لاریو او مسافرینو پر مخ خلاصه شوې ده.
د طالبانو د ننګرهار د امنیه قوماندانۍ چارواکي وايي، چې له پاکستاني لوري سره له خبرو وروسته د تورخم دروازه د باروړونکو لاریو او مسافرینو پر مخ خلاصه شوې ده.
له دې وړاندې په تورخم کې د طالبانو کمیسار عصمت الله يعقوب ویلي وو، چې د تورخم دروازه يو ځل بيا د پاکستاني چارواکو لهخوا د ترانزېټ پرمخ نن غرمه په داسې حال کې وتړل شوه، چې له موټر چلوونکو څخه يې د وېزې او پاسپورت غوښتنه کوله.
کميسار دا هم وويل، دوی تر اوسه له موټر چلوونکو څخه د وېزې او پاسپورټ غوښتنه نه ده کړې.
بل خوا د طالبانو د ننګرهار د امنیه قوماندانۍ ویاند رییس زابلی وايي، چې له پاکستاني لوري سره د خبرو وروسته دغه لاره بېرته خلاصه شوې ده.
دا چې پاکستان به بیا هم د وېزو او پاسپورټونو غوښتنه کوي او که نه په اړه یې نوموړي څه نه دي ویلي.
تر دې وړاندې هم په دغه لاره له بار وړونکو موټرو څخه د تګ راتګ لپاره د پاسپورت او ويزې غوښتنه نه کېدله؛ خو نن يوځل بيا د پاکستاني لوري په همدې پلمه دغه لاره د ټرانزېټ پرمخ وتړل شوه.
تر دې وړاندې پاکستانۍ رسنیو راپور ورکړی، چې د تورخم دروازه د طالبانو لهخوا د تګ راتګ پر مخ تړل شوې ده.
