ازبکستان د افغانستان د ریل پټلۍ په ۵۰ سلنه تخفیف جوړوي
د رېل وې مجلې په خپل یوه تازه راپور کې ویلي، چې د ازبکستان د ریل پټلۍ دولتي شرکت له خوا د افغانستان نېږدې ۷۵ کیلومتره ریل پټلۍ په ۵۰ سلنه تخفیف جوړیږي.
د رېل وې مجلې په خپل یوه تازه راپور کې ویلي، چې د ازبکستان د ریل پټلۍ دولتي شرکت له خوا د افغانستان نېږدې ۷۵ کیلومتره ریل پټلۍ په ۵۰ سلنه تخفیف جوړیږي.
په راپور کې ویل شوي، چې د ازبکستان د ریل پټلۍ دولتي شرکت "ازبک ریل ویز" له خوا به د حیرتان - مزار شریف د ریل پټلۍ چارې پیل شي.
دغه شرکت د پنځوس سلنه تخفیف په نظر کې نیولو سره ویلي، چې د یادې پروژې لګښت شپږ میلیونه ډالره دی.
بل خوا له دې وړاندې د طالبانو ویاند ذبیح الله مجاهد وايي، چې په افغانستان کې د حیرتان – مزار شریف ریل پټلی چې ۷۵ کیلومتره اوږدوالی لري د بیارغونې چارې به یې ډېر ژر پیل شي.
تېره اونۍ د طالبانو د صنعت او سوداګرۍ وزیر له پاکستان او ازبکستان سره د افغان ټرانس ریل پټلۍ په راتلونکو پړاوونو، درې اړخیزې سوداګرۍ او ټرانزیټ، د سیمه ییز اتصال پر ستونزو او اړوندو مسایلو خبرې کړې دي.
په اسلام اباد کې د طالبانو سفارت د سې شنبې په ورځ (د نومبر ۱۴مه) پر اېکس ټولنیزې شبکې لیکلي وو، چې د افغانستان، پاکستان او ازبکستان په درې اړخیزه غونډه کې د طالبانو د صنایعو او سوداګرۍ د وزیر نورالدین عزیزي په مشرۍ یوه پلاوي ګډون کړی و.
