د خيبر پښتونخوا په کورمه کې د لاس بم یا ګرنېټ د چاودنې له امله نن ځايي وخت مازیګر مهال دوه ماشومان وژل شوي او شپږ نور ژوبل شوي دي. پېښه د کوزې کورمې د صدې په متخوزه کې هغه مهال وشوه چې ماشومانو د خپل کور سره نږدې له پیدا شوي لاس بم سره لوبې کولې.
د ماشومانو عمرونه د ۱۱ او شپږو کلونو ترمنځ ښودل شوي او صدې روغتون ته وړل شوي دي.
ځینې رسنیو کې د درې ماشومانو د وژل کېدو خبره شوې ده.
خو په صده کې د روغتون یوه ډاکټر نعمان خان هم افغانستان انټرنشنل پښتو ته وویل، چې دوه ماشومان وژل شوي او شپږ ټپیان دي.
په دې وروستیو کې کورمه د سني او شیعه مذهبو ترمنځ د تاوتریخوالي ډګر وه چې له امله یې تر څلوېښتو ډېر کسان ووژل او په لسګونو نور ټپیان شول.
د قطر یو پلاوی د شنبې په ورځ -د نومبر په ۲۵مه نېټه - تل ابیب ته لاړ، چې د حماس او اسراییل تر منځ د څلور ورځني اوربند پر غځولو خبرې وکړي. د قطر عملیاتي پلاوی له اسراییلي چارواکو سره د اوسني اوربند پر دوام او د پاتې یرغمل کسانو پر خوشي کولو هم غږېدلی دی.
مصر د حماس او اسراییل ترمنځ د اوریند غځولو ته په خوشبینې سره اشاره کړې چې اوربند به د یوې یا دوو ورځو لپاره وغځول شي.
د قطر په منځګړتوب پرون د اسراییل او حماس څلور ورځنی اوربند د ۱۵۰ فلسطیني وګړو په بدل کې د ۵۰ یرغملو د خوشي کولو لپاره پیل شو.
د قطر په مځګړتوب غزه کې د اوربند په لومړۍ ورځ حماس ۲۴ او اسراییل ۳۹ یرغمل کسان خوشي کړل.
د پاکستان رسنیو راپور ورکړی، چې د خېبر پښتونخوا په بنو کې د دیني عالمانو یوې ډلې (امامانو) یو بیان خپور کړی او غوښتنه یې کړې، چې په سمدستي توګه دې د دغې سیمې په لوبو کې د نجونو په ګډون بندیز ولګول شي.
دوی په یوه بیان کې ویلي:« موږ د نجونو د زدهکړې مخالفت نه کوو؛ خو په سپورتونو کې د دوی ګډون فحشا ته وده ورکوي او که بندیز پرې و نه لګول شي، موږ به اعتراضي حرکتونه پیل کړو.»
په پاکستان کې ښځې وخت نا وخته د دغه ډول «تندلاریو» سره مخامخېږي.
تر دې وړاندې هم په خېبر پښتونخوا کې نجونې له ورزش څخه راګرڅول شوې وې.
تېره میاشت هم په پاکستان کې د نړۍ ښکلا سیالۍ کې د یوې پاکستانۍ موډلې ګډون غوغا جوړه کړه.
د مېس یونیورس"د نړۍ مېرمن" ښکلا سیالۍ کې د پاکستانۍ موډلې اېرېکا روبېن ګډون په دغه هېواد کې غبرګونونه راپارولي وو.
په پاکستان کې دیني عالمانو ټینګار کړی، چې حکومت دې د دې سیالۍ د مسوولینو پر ضد اقدام وکړي او ان د دغه هېواد لنډمهاله لومړي وزیر یې هم د پلټنې غوښتنه کړې وه.
د مېرمن یشیل ګوز په مشرۍ مرکزي منځلاري ګوند اعلان وکړ چې د هالنډ په راتلونکې کابینه کې برخه نه اخلي. دا پرېکړه د اسلام او کډوالو ضد جنجالي سیاستوال، خیرت ویلډرس لپاره ستر ګوزار بلل کیږي.
ویلډرس هیله مند و،چې د اکثریت رایو په ترلاسه کولو سره له مېرمن یشیل ګوز ګوند سره یو حکومت جوړ کړي.
د منځلاري ښي اړخي VVD ګوند مشرې، چې د هالنډ په وروستیو ټاکنو کې یې ۱۰ څوکۍ له لاسه ورکړې، وايي چې دا یو متفاوت رول ته اړتیا لري.
اوس د ښي اړخي سخت دریځه PVV ګوند خیرت ویلډرس د ایتلافي حکومت جوړولو لپاره د نوي شریک په لټه کې دی.
دغه ګوند د سې شنبې په ټاکنو کې د هالنډ د استازو د جرګې له ۱۵۰څوکیو څخه ۳۸ وګټلې، چې تر بل هر ګوند ډېرې دي.
د ګډ کارګر / زرغون غورځنګ ۲۵ څوکۍ ترلاسه کړې او مرکزي ښي اړخ ګوند VVD وشو کړای ۲۴ څوکۍ ترلاسه کړې.
د حکومت جوړولو لپاره، د ویلډرس ګوند د دوو منځلارو ښي اړخو ګوندونو سره یو ایتلاف ته اړتیا لري، چې دواړو ګندونو له هغه څخه غوښتنه کړې چې ډیری هغه اسلامي ضد سیاستونه پریږدي چې پرې مشهور دی.
تمه کیږي چې د هالنډ د نوي ایتلافي حکومت جوړېدل به څو میاشتې وخت ونیسي.
د قطر په منځګړتوب غزه کې د اوربند په لومړۍ ورځ حماس ۲۴ او اسراییل ۳۹ یرغمل کسان خوشي کړل. حماس د اسراییلیو میرمنو، ماشومانو او د تایلینډي فارم کارګرانو په ګډون ۲۴یرغمل خوشي کړل. قطر ویلي، د ۱۳ اسراییلیانو په بدل کې ۳۹ فلسطینۍ ښځې او ماشومان د اسراییل له زندانونو خوشي شوي دي.
سور صلیب نړیواله کمیټه وايي، د حماس له خوا یرغمل شوي کسان د دوی په همکارۍ له غزې بهر لیږدول شوي او د رفح په پوله کې مصري چارواکو ته سپارل شوي دي.
د رویټرز خبري اژانس په راپور کې راغلي، قطر چې د اوربند منځګړتوب یې کړی وایي چې ۱۳ اسراییلیان خوشي شوي، چې ځینې یې دوه ګونی تابعیت لري، لس تایلنډیان او یو فیلیپینی وکړی هم په دې کسانو کې شامل دی.
د منځني ختیځ لپاره د سور صلیب سیمه ییز مشر فابریزیو کاربوني وویل: "هغه ژور درد چې د کورنۍ غړو د خپلو عزیزانو څخه د جلاکیدو له امله لیدل د بیانولو وړ نه دي. موږ خوشحاله یو چې ځینې به له اوږده کړاو وروسته بیا سره یوځای شي."
اسرائیلو د یرغمل شوو اسرائیليانو نومونه خپاره کړي، چې په کې څلور ماشومان او د هغوی د کورنۍ څلور غړي او پنځه نورې د پوخ عمر میرمنې شاملې دي.
د اسرائیلي پوځ په یوه اعلامیه کې راغلي چې د خوشي شوو یرغمل کسانو لومړنۍ طبي ارزونې د دوی په خاوره کې شوې. دوی به د اسراییلروغتونونو ته د تګ په وخت کې د دفاعي ځکوانو د سرتیرو له خوا بدرګه او هلته به له خپلو کورنیو سره یوځای شي."
لومړي وزیر بنیامین نتانیاهو په یوه ثبت شوي ویډیویي پیغام کې ویلي: "موږ د خپلو یرغمل شویو د لومړۍ ډلې د بېرته ستنېدو بهیر بشپړ کړ، ماشومان، د هغوی میندې او نورې ښځې. هر یو په خپل ذات کې یوه نړۍ ده، خو زه دا ټینګار کوم چې موږ دې ته ژمن یو چې خپل ټول یرغمل بیرته راستانه کړو."
د اسراییلاو حماس تر منځ د څلور ورځني اوربند له مخې باید ۵۰ تنه یرغمل شوېښځې او ماشومان خوشي شي، چې په بدل کې به یې د اسراییل په زندانونو کې د زرګونو بندیانو له ډلې ۱۵۰ فلسطینۍښځې او ماشومان خوشي شی. اسراييل وايي، که د ورځې ۱۰ نور يرغمل خوشي شي، ښايي اوربند وغځول شي.
د امریکا بهرنیو چارو وزارت وايي، په پاکستان کې یې د هغو افغان پناه غوښتونکو لپاره چې امریکا ته د تګ لپاره خپلې دوسیې ته په تمه دي، د بیړنۍ ټلیفوني اړیکې شمېره جوړه کړې ده.
دغه وزارت ویلي، چې دغه شمېره به د سهار له اتو بجو تر نیمې شپې پورې د مستقیمې اړیکې او واټساپ له لارې فعاله وي.
د متحده ایالاتو د بهرنیو چارو وزارت پر اېکس ټولنیزه شبکه لیکلي، چې هغه پناه غوښتونکي چې د نیول کیدو او ایستلو له خطر سره مخ کیږي له دې شمېرې سره اړیکه نیولی شي.
دا اقدام وروسته له هغه کېږي چې پاکستان په اکتوبر میاشت کې ټولو هغو کډوالو ته چې په دغه هېواد کې د اوسېدو اسناد نه لري یوه میاشت وخت ورکړی و چې ووځي، که نه نو دوی به ونیول شي او په زور به وایستل شي.
له ټاکلې مودې وروسته پاکستان د بې اسنادو افغانانو ډله ییز ایستل پیل کړل.
د طالبانو له واکمنۍ راهیسې دا مهال په زرګونه افغانان پرته له اسنادو او یا هم له تاریخ تېرو ویزو سره په درېیمو هېوادونو کې په تمه دي تر څو نورو هېوادونو ته ولاړ شي.
دېری دغو کډوالو د غربي حکومتونو او بنسټونو سره کار کړی او د بشرپالو لاملونو له مخې په دغو هېوادونو کې د استوګنې شرایطو سره برابر دي.
د ملګرو ملتونو او د بشري حقونو د سازمانونو له خوا د افغان کډوالو د ډله ییز ایستلو د بندولو له غوښتنې سره سره، پاکستاني چارواکو ویلي چې دوی د ایستلو پلان په جدي توګه عملي کوي.
د پاکستان د کورنیو چارو موقت وزیر سرفراز بګټي وايي، تر اوسه شاوخوا ۳۰۰ زره بې اسناده کډوال خپل هېواد ته ستانه شوي، چې ۹۹ سلنه یې له افغانستانه دي.
