د کندهار ښار یو شمېر اوسېدونکو افغانستان انټرنشنل ـ پښتو وویل، چې د طالبانو د امربالمعروف محتسبینو په لارو کې چیک پواینټونه جوړ کړي دي. دوی زیاتوي، چې د څارنې دغه ډلې ځوانانو ته د ږېري د نه خريلو، د مفشنو وېښتانو د نه جوړولو او د موسيقې نه اورېدولو لارښوونې کوي.
د کندهار ښار اوسېدونکو نن دوشنبه ( د لیندۍ ۶ مه ) افغانستان انټرشنل ـ پښتو ته وویل، چې طالبان په دغه چیک پواینټونو کې د خلکو موبایلونه پلټي او شخصي تصویرونه او ویډیوګانې یې ګوري.
دوی شکایت کوي، چې په ساعتونو - ساعتونو ځوانان په عمومي لارو کې منتظر کوي او که چېرې د دوی د تمې خلاف ویډیو یا تصویر په موبایل کې وګوري نو بیا یې ګواښي.
ځوانان وايي؛ د طالبانو د امربالمعروف او استخباراتو کارکوونکي په تفريح ځايونو، ورزشي لوبغالو، د خوښيو په پروګرامونو، بازارونو، هټيو او د تګ راتګ پر مهال په دومداره توګه ځوانان تعقيبوي.
په ورته وخت کې سرچینې وايي، چې په کندهار کې د ورزش او په ځانګړي ډول د فوټبال لوبغاړو ته هم د امربالمعروف ادارې له لوري په شفاهي ډول خبرداری ورکړل شوی، چې د لوبو کولو پرمهال باید مکمل لباس واغوندي.
دوی ته ویل شوي، چې د فوټبال پر مهال باید د دوی پښې او لاسونه پټ وي.
په کندهار کې د ځينو دولتې ادارو د مامورينو په خبره، چې په يو شمېر ادارو کې د امربالمعروف ادارې د کارکوونکو له لورې ورته د ديني زده کړو ټولګي جوړ شوي او دغه صنفونه د ماسپښين له ۱۲ بجو څخه تر يوې نيمې بجې دوام لري چې د مامورينو ګډون پکې حتمي وي.
د کندهار د پوهنې رياست يو کارکوونکی چې نه يې غوښتل نوم یې واخیستل شي وايې؛ د ږيرې پرېښودل، د منظمو اوږدو کاليو د اغوستلو، پټکي تړلو او د دينې امورو د عملې کولو جدې خبردارۍ ورکول شوی.
هغه وویل: " موږ ته يې د دينې کتابونو لړۍ شروع کړې، وروسته امتحان اخلي او هر مامور که په امتحان کې پاتې شي له دندو يې لرې کوي".
امربالمعروف اداره دغه ټولې چارې په شفاهې ډول عملي کوي او هېڅ يوې ادارې ته رسمي مکتوب نه لېږي.
په کندهار کې د طالبانو د امنيې قوماندانۍ یو چارواکی وایي؛ دلته ځکه د اصلاح په نوم بنديزونه ډېر دی، چې د طالبانو مشر هبت الله اخوندزاده اوسيږي او د طالب مشرانو تګ راتګ ډېر دی.
د طالبانو په ليکو کې د امربالمعروف اداره ځان تر نورو ادارو خپلواکه او لوړه ګڼي، د دوی د معلوماتو له مخې؛ ددې ادارې مسوولين په مستقيم ډول د طالبانو مشر هبت الله اخوندزاده ته ځواب ورکوونکي دي.
په کندهار کې د مدني فعال عبدالحکیم الفت کورنۍ نن دوشنبه ( د لیندۍ ۶ مه ) افغانستان انټرنشنل - پښتو ته وویل، چې نوموړي یوه طالب پلوه ته په کمېنټ کې د نجونو د بندو ښوونځيو، د لوړو زده کړو د بندو مرکزونو، پر ډېورنډ کرښه د افغان مېرمنو د ځورونو، د زياتو اقتصادي ستونزو او د بې دندو ځوانانو اړوند يو کمېنټ کړی و.
د الفت کورنۍ وايي، چې څو ځله مشران د استخباراتو ادارې ته ورغلي او يوازې ورته د ژر خوشې کولو ډاډ ورکول شوی دی.
عبدالحکیم الفت د ټولنيزو رسنيو فعال و، چې د طالبانو واک لاندې یې هم د خلکو د ستونزو په اړه لیکل کول.
د طالبانو د استخباراتو ادارې تر اوسه د هغه د نیولو په اړه رسنيو ته څه نه دي ويلي.
د طالبانو واک ته له رسېدو سره دغه ډلې په افغانستان کې بیان ازادي او رسنیو باندې محدودیتونه ولګول.
طالبانو په افغانستان کې رسنۍ سانسور کړې دي او هېڅ رسنۍ د دغې ډلې په خلاف منفي راپورونه نه شي نشرولی؛ بلکې په ټولنیزو رسنیو کې هم عام خلک له دغه کاره منع شوي دي.
تر اوسه پورې ګڼ شمېر ټولنیزو رسنیو فعالان شکنجه او زنداني کړې دي.