د پاریس ښاروالې این ایډالګو د دوشنبې په ورځ اعلان وکړ چې د اېکس پاڼې پخواني ټویټر کارول يې پریښودل. هغې دغه شبکه د «لوی نړیوال ککړځای» په توګه یاده کړه چې د ځورونې، ناسمو معلوماتو، د ساینس پوهانو او ښځو په وړاندې د کرکې په خپرولو سره «ډیموکراسي ویجاړوي.»
امریکايي میلیارډر ایلن ماسک تېر کال د ټویټر له اخیستو وروسته دغه نوم اېکس ته بدل کړ او سلګونه کارکونکي یې له دندو ګوښه کړل. ډیری نېوکه کونکي په دې باور دي چې د اېکس مدیرانو په دې ټولنیزه شبکه کې د کرکې وینا، ځورونې او د یهودیت ضد مبارزې د مخنیوي له پاره کافي هڅې نه دي کړې.
په فرانسوي او انګلیسي ژبو په یوه پوسټ کې، آغلې ایډالګو لیکلي چې «دا پلیټ فارم او څښتن یې په لوی لاس دا ډول تاوتریخوالي او شخړو ته لمن وهي.»
هغې زیاته کړه: «دا شبکه په یو لوی نړیوال ککړځای بدله شوې ده. ایا موږ لا تر اوسه په دې کې بوخت یو؟ "زه د دې ناوړه پلان او دغې شیطاني طرحې له منلو منکره یم.»
ایلن ماسک، د جنجال جوړونکې اېکس پاڼې څښتن، په ځلونو د بیان د ازادۍ او په دې شبکه کې پر سانسور د مخالفت دفاع کړې ده. هغه، هغو کارونکو ته هم اجازه ورکړه چې د کرکې وینا او د پخوانیو ټویټر چارواکو لخوا د توکمپالنې خپرولو له امله يې حسابونه ځنډول شوي و، چې بیرته اېکس پاڼې ته راستانه شي.
