فلسطین کې اوربند؛ مشهوره فلسطینۍ زنداني اسراء جعابیص د اسراییل له بنده خوشې شوه
د حماس او اسراییل ترمنځ د تبادلې د هوکړې په درشل کې د خوشې شویو کسانو په ډله کې پیژندل شوې فلسطینۍ زنداني اسراء جعابیص هم شامله ده.
د حماس او اسراییل ترمنځ د تبادلې د هوکړې په درشل کې د خوشې شویو کسانو په ډله کې پیژندل شوې فلسطینۍ زنداني اسراء جعابیص هم شامله ده.
نوموړې په ۲۰۱۵ کال کې تر هغه وروسته چې د اسراییلي پولیسو پوستې ته نږدې د موټر بم په چاودنه کې چې د یوه پولیس افسر د ټپي کیدو لامل شو په ۱۱ کاله بند محکومه شوه او اوسمهال یې د بند اته کاله تېر شوي دي.
د هغې د سوځیدلي مخ انځور له کلونو راهیسې د فلسطین په لاریونونو او اعتراضي راټولیدنو کې په یوه مشهورانځور بدل شوی دی.
د جعابیص د نيول کېدو د پېښې په اړه بېلابېلې او متضادې کيسې ويل شوې دي.
هغې له خوشي کېدو وروسته له خبريالانو سره په خبرو کې وويل، چې په خپل موټر کې يې د ګازو يوه ډبه د ډکولو په نيت لېږداوه، چې په ناڅاپي ډول د اسرایيلي پوليسو يوې پوستې ته څېرمه وچاودید.
له دې چاودنې وروسته اسراییلي پولیسو هغه په سوځېدلي او ټپي حالت کې ونیوله.
له بلې خوا اسراييلي چارواکي بیا ویلي و چې، نوموړې د ترهګریز برید د ترسره کولو په نيت د ګازو يوې ډبې ته د «الله اکبر» په ویلو سره چاودنه ورکړه چې د یوه پولیس افسر د ټپي کیدو لامل شو.
اسراء جعابیص له خوشې کیدو وروسته ختیځ اورشلیم کې خپل کور ته ولاړه.
د یادولو ده، د هغې زوی معتصم چې اوس پنځلس کلن دی، د مور د نیولو پر مهال یې اته کلن و.
په غزه کې د اوربند د هوکړې له مخې چې د قطر په منځګړیتوب شوې ده، ټاکل شوې د اوربند په څلورو ورځو کې ټول ۵۰ اسراییلي یرغمل شوي په۱۵۰ فلسطینیانو تبادله شي.
