منظور پښتین: د پاکستان او افغانستان تر منځ پر ټولو تلونکو او راتلونکو لارو پاسپورټ نه منو

AP ۱۴۰۲ لیندۍ ۷

د پښتون ژغورنې غورځنګ مشر منظور پښتین چې د چمن په پرلت کې یې د ګډون پر مهال وینا کوله وویل، پاکستان په قانون، اسلام او جرګو کې د پښتنو حق نه ورکوي خو پښتانه به د خپلو حقونو ترلاسه کولو له پاره له هرې ممکنې لارې کار اخلي.

د سه شنبې په ورځ د (لیندۍ ۷مه) د پښتون ژغورنې غورځنګ مشر منظور احمد پښتین د چمن په پرلت کې ګډون وکړ.
نوموړي د پاکستان له لورې د سپین بولدک ـ چمن پر دروازه د پاسپورټ د حتمي کېدو په غبرګون په جوړ شوي پرلت کې په ۳۹ مه ورځ ګډون وکړ او داسې ویل کیږي چې نوموړی به د دوو ورځو له پاره په دغه پرلت کې ګډون وکړي.
منظور پښتین وايي، دا د حق غوښتنې یو لوی حرکت دی باید د تر لاسه کولو له پاره یې مخته لاړ شو، او د حق غوښتنې له مبارزې څخه به نه په شا کیږو.
نوموړی وايي: «موږ نه یواځې چې د سپین بولدک ـ چمن تر منځ پر دروازه پاسپورټ نه منو، بلکې پر ډیورنډ کرښه د افغانستان او پاکستان تر منځ پر ټولو لارو پاسپورټ نه منو. د چمن پرلت د حق غوښتنې یو لوی غږ دی او د دې غږ د لویولو له پاره به د پښتون ژغورنې غورځنګ له لوري په ټول پاکستان کې لاریونونه تر سره کړو.»
همدارنګه ښاغلي پښتین د پاکستان حکومت له لوري په زور د افغان کډوالو اېستلو په اړه غبرګون وښود، نوموړی وايي: «پاکستان د نورو هیوادونو په اشاره غواړي پښتانه سره بیل کړي او امریکا یو ځل بیا غواړي چې جګړه رامنځته کړي او دا ځل به بیا د دې جګړې قربانیان پښتانه وي.»
همدارنګه منظور پښتین د پاکستان حکومت له لوري د بلوڅانو د وژنو او ورکیدو په غبرګون کې وايي: «موږ د مظلومانو تر څنګ یو موږ د ظلم خلاف یو او پاکستان ظالم دی.»
د پښتون ژغورني غورځنګ مشر منظور پښتین به سبا د چهار شنبې په ورځ هم د چمن پرلت کې د سپین بولدک ـ چمن پر دروازه د پاسپورټ د جبرې کیدو په غبرګون یو ځل بیا وینا وکړي.
د پښتون ژغورنې غورځنګ مسولین وايي، د اروپایي هیوادونو تر څنګ به د پاکستان په بېلابېلو ښارونو کې هم د چمن د پرلت په ملاتړ لوی لاریونونه پیل کړي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ