د قرغزستان د بېړنیو حالاتو وزارت اعلان کړی چې د دغه هېواد د ولسمشر په امر به د هرات زلزله ځپلو ته بشري مرستې ولېږي. قرغزستان ویلي چې هرات ته به سل ټنه خوراکي توکي، ژمنۍ جامې، بوټان او د ښځو او ماشومانو لپاره د روغتیا ساتنې توکي ولېږي.
د قرغزستان دولتي رسنیو د دوشنبې په ورځ (لیندۍ ۶مه) د دغه هېواد د بیړنیو حالاتو وزارت د رسنیز دفتر په حواله خبر ورکړ چې قرغزستان د افغانستان له خلکو او د قربانیانو له کورنیو سره خواخوږي څرګندوي او ټپیانو ته د عاجلې روغتیا هیله کوي.د قرغزستان د بېړنیو حالاتو وزارت اعلان کړی چې ډېر ژر به افغانستان ته مرستې ورسېږي.په افغانستان کې د ملګرو ملتونو د بشري مرستو د همغږۍ دفتر مخکې اعلان کړی و چې د هرات د زلزلې له قربانیانو سره د مرستې له پاره د ۲۰۲۴ کال تر مارچ میاشتې پورې ۱۷۳ میلیونه ډالرو ته اړتیا لري.اوچا وايي د هرات زلزله ځپلي خوراکي توکو، روغتيايي خدمتونو، نغدي مرستو او د څښاک اوبو ته اړتيا لري. دغې ادارې د وړمې پنجشنبې په ورځ د لړم د میاشتې په ۲۵ مه نېټه د هرات د زلزلې له قربانیانو سره د مرستو د اړتیا په اړه خپل پلان خپور کړ.د افغانستان په لوېديځ کې هرات ولايت د روان کال د تلې په ١٥مه د يوې خونړۍ زلزلې شاهد و، چې څو اوونۍ وروسته يې هم ټکانونو دوام درلود. د راپورونو له مخې، د دغو زلزلو په پایله کې شاوخوا دوه زره کسان مړه شوي او زرګونه نور ټپیان شوي وو.
