د ننګرهار ولایت د رسنیو مرکز په خپرې شوې خبرپاڼه کې راغلي، چې د دغه ولایت د غصب د مخنيوي تخنيکي پلاوي، د سره رود په ولسوالۍ کې د حاجي عبدالقدير ښارګوټي پر ځمکو د خلکو د ادعاوو له مخې قبالې تطبيق کړې او مرکز سره يې د وروستيو اجراتو په موخه معلومات شريک کړل.
په خبرپاڼه کې راغلي، چې دغه ښارګوټي کې تخنيکي ډلې د نقشې له مخې هر اړخيز معلومات وړاندې کړل او پرېکړه وشوه چې د قانون له مخې به نور ګامونه هم واخیستل شي.د خبرپاڼې له مخې:« د دغه ښارګوټي په يو شمېر برخو ځايي اوسېدونکو ادعاوې کړې چې د دوی شخصي ځمکې په کې غصب شوي دي، چې د غصب د مخنيوي تخنيکي پلاوي يې د ملکيت تثبيت او حق حقدار ته د سپارلو په موخه کار پيل کړی دی.»تر دې وړاندې هم د افغانستان په بېلابېلو برخو او سیمو کې د ځمکو د غصب راپورونه خپاره شوي و او یو شمېر خلکو ادعا کړې وه، چې ځینو زور واکانو د دوی شخصي ځمکې غصب کړي او ښارګوټي یې پرې جوړ کړي دي.
