د قرغزستان د بهرنیو چارو وزیر جین بیک کولبایف د سې شنبې په ورځ (د نومبر په ۲۸مه) د ملګرو ملتونو د عمومي منشي له ځانګړې استازې او په افغانستان کې د ملګرو ملتونو د مرستندویه ماموریت له مشرې روزا اوتونبایوا سره کتلي او د افغانستان په اړه یې خبري کړي.
روزا اوتونبایوا د منځنۍ اسیا د هېوادونو د بهرنیو چارو د وزیرانو په دیارلسمه غونډه کې ګډون وکړ او هلته یې د افغانستان په اړه راپور وړاندې کړ.
د قرغزستان د بهرنیو چارو وزیر کولبایف وویل، چې قرغزستان په ۲۰۲۳ کال کې افغانستان ته د بشردوستانه مرستو څلور بستې استولې دي.
روزا اوتونبایوا په افغانستان کې د ټولنیز، اقتصادي او بشري وضعیت په اړه معلومات وړاندې کړل.
هغې په افغانستان کې د ملګرو ملتونو د مرستندویه پلاوي هڅې وستایلې.
دواړو خواو د قرغزستان او په افغانستان کې د ملګرو ملتونو د مرستندویه پلاوي ترمنځ د مثبتو خبرو اترو د دوام او په افغانستان کې د روانو بهیرونو په اړه د معلوماتو ورکولو لپاره چمتووالی څرګند کړ.
